İsbutho du radyo du Swed dlımahıtle bu leşono Suryoyo mawduconutho cali Corona kımdawmo
İ sbutho du radyo du Swed dlo frısle mawdconutho calu kewo d’Corona bu leşono Suryoyo kımdawmo dmicaqbo me qariwo.
U folitiqoro du cameydan Aday Bethkınne kıthuwole lu radyo du Swed, bıthır mıd şamıcwo u tebo dfrıswolan bi sbuthathe.
Bıthır mıd u folitiqoro du cameydan Aday Bethkınne kıthuwole lu frosqolo du Swed u mşayewole mene, qay lo frıslın mawdconutho bu leşono Suryoyo cala tadbire dıklozım dmimodi mqabıl du virus. İ mdabronutho du frosqolo mfanela u şwolo d’Bethkınne, elo i mawdconuthathe latyo maqınconitho ulo mahwela i celtho kamılto dlo hzela sniqutho, dobo mawdconutho bu leşono Suryoyo.
Bu funoyo i mdabronutho du frosqolo kımmo; metul dlatlan mkone ğalabe, kobina mawdconutho ba leşone dkito grube ğalabe dıkmijğoli ebe xıd Caraboyo, Kurdoyo-Kurmanci, Sorani, Fırsoyo, Somali u ğer. Be bzabno u frosqolo komır; ğalabe ma grube dkothın mu Madınho Mescoyo kmıjğoli Caraboyo, camgabe du leşono emhoyo dkıtlın mawxa, huwlan i mawdconutho bu leşonano.
Bu mamlo dhawilan camu folitiqoro Aday Bethkınne mawdacle, dıkthuwle naqla hreto lu frosqolo du Swed u mahwele hfuxyo calu funoyo dhulın u mırle:
Ono kmıtyaqano u grub du camo Suryoyo ha ma grube rabe dımgalwele lu Swed’yo, u da tre i sbutho du camo kmıjğıl bu Caraboyo inaqla’yo u camo Kurdoyo dıkmıjğıl Kurdoyo u Sorani’ste, kudci Caraboyo qay inaqlayo kmitahwe ba tre leczani.
Bethkınne komır; kıtli iqoro la leşone kulle, elo i sbutho dkıtla asirutho ba haye du camo, laybe dmisım bu şıkılano, u lıkmıtyaqano dkıtyo mede dıkmkalıf zuze ğalabe. Bethkınne komır; mırli lu frosqolo, bıthır mıd kıtyo sbutho da haye du camo, ono kibi mtarjamno i mawdconutho bu leşono Suryoyo magon dlo zuze.
Aday Bethkınne bi egartho dımşadrole lu froshezwo du Swed komır; u frosqolo du Swed frosqolo radyo du athro’yo u kmirabe ma zuze di madatho dkobe u camo Suryoyo wa bnaymothoye hrene du Swed. Mawxa u frosqolo du Swed klozım dımqadım bışawyutho la bnaymothoye kulle.