İsroyel kımdawmo a’hçomayda calu qlimo d’Ğaza, u mawdacla du gayso İsarloyo mabdele cuqobo di naşfe bu mesco ubu taymno d’Ğaza

ISROYEL – Adyawma safrayto, u gayso d’İsroyel mnıcle u mazlo u mathyo bu gbino d’Salahıddin dkıtyo u darbo rişoyo dıkmasır u garbiyo du qlimo d’Ğaza camu taymnayde. U meqım mathe ste, u gayso İsarloyo mawdacle dmabdele cuqobo folhoyo mhaddıdo di naşfe bu qlimo Fleştoyo. 

U malolo du gayso d’İsroyel Avixay Adırci bi maqırhonutho dıfrısle bi dafo d’X mırle “ba şoce dşaficina mşarelın a’haylawotho du gayso du sutoro cuqobo mhaddıdo di naşfe b’gawıd di fnitho dıknıflo bu mesco du qlimo d’Ğazza ubu taymnayde, bnişo dmitarwıho i fnitho du sutoro bayn du garbiyo du qlimo udu taymnayde. Laşan di mşaynuthathxu kmımnıc u mazlo u mathyo bu gbino d’Salahıddin bayn du garbiyo du qlimo d’Ğaza wu taymnayde”. 

Bebzabno, u gayso İsarloyo mawdacle dıfrısle a’haylawothayde hulu mesco du gbino d’Natsarim u mırle “kfılhina ucdo laşan dmarwıhina i fnitho di mşaynutho bayn du garbiyo udu taymno d’Ğaza”. 

M’gabo hreno, u malolo du zawco d’Hamas Cabdıllatif Alqanuc mawdacle da droşe kımdawmi cama n’athrawotho mescoye, bnişo dmitaklın a’hçome İsarloye calu camo d’Ğaza, udmıçboro İsroyel dfayşo masırto camu qyomo di şalyuthzayno, udıdıcro mi tahraztayda. Alqanuc bi maqırhonutho dhule adyawma lu ajans da tebe Fleştoye d’Safa mırle ste “ahna masrena camu qyomo di şalyuthzayno, ukfılhina cama mescoye laşan dmarıhqina u qrobo aminoyith mu camaydan, udmıgrış u gayso kaboşo d’İsroyel mu qlimo d’Ğaza”. 

Adyawma ba şoce dfothıdsafrayto, İsroyel sımla hçome oyaroye hathe calu qlimo d’Ğaza bıthır mu zuhoro haroyo dımşadarla la comure du qlimo ida d’Hamas dlımarfiyo a’yasire İsarloye. Lfuth u matibono du froshezwo d’Alcarabiya, u menyono da Fleştoye dıqtili ba hçomani yasıq l’71 farsufe.