İsroyel liğimiğroşo ma 5 nuqazyotho dkitla v’Lebnon

ISROYEL/LEBNON – Mabuco deblomasi İsarloyo makadle du gayso d’İsroyel lığıdmığrış ma hammış nuqazyotho dmarkawle ruhe ebaye bu taymno d’Lebnon. U gayso d’İsroyel mawdacle ste dgıdgorış a’haylawothayde mu taymno d’Lebnon, bu zabno dmi’akıd du gayso Lebnonoye kibe dsoyım u duyoqo da thumayde dcam İsroyel 100%.

Cayni mabuco makadle ste du fyoşo da haylawotho İsarloye ba hammış nuqazyotho bu taymno d’Lebnon, kşowe li tahrazto du duyoqo dımbayno bi netiçe du qyomo di şalyuthzayno dımdewo İsroyel cam Lebnon bıthır mu qrobo dhawiwo mqabıl d’Hizballa ba Tışerın dşaficina. 

İsroyel lımkamela u groşo da haylawothayda mu taymno d’Lebnon lfuth i muhle dıtayimo 18 bu yarho d’Şbot dşaficina, ubalhude u gayso İsarloyo griş mhın fenyotho dmandıfile mi milişya İranoyto d’Hizballa, elo markawle ruhe b’hammış dukotho rişoye bu taymno d’Lebnon. 

İsroyel kım’akdo di celtho du fyoşayda ba hammış nuqazyothani, cal du gayso Lebnonoyo laybe dsoyım i wolithayde b’şıkıl kamilo lfuth u qyomo di şalyuthzayno, ucal dlatle a’mkone dsoyım u duyoqo di mşaynutho calu xtuto zarqo. 

Camgabıdathe, cayni mabuco deblomasi mawdacle d’İsroyel kıbco b’şıkıl çıddi dım’amno u shofo du gbino İranoyo bu darbo da cuqobe folhoye, u mathkarle ste di şultonutho dı Tel Aviv kmıtyaqno du darbo folhoyo u şroyo towo dkulle yo bıthır mu hçomo dsımwo 7 bu yarho dı Tışrın u Qadmoyo bi şato da 2023.