30/03/2021

İsroyel mzaharla u İran dgımdawım dsoyım hçome cal nişe İsarloye

İsroyel maglela du İran gıdımdawım bu maşıqlo dıbqamuthayna d’soyım hçome cal nişe İsarloye bu madınho mescoyo.

Camgabıdathe, İsroyel mawdacla dıgıdsaymo tedbiqat folhoye rabe bu athro d’Qufrus bu qayto dıbqamuthayna.

İ sictho İsarloyto dıknıfqo mqabıl di marıhbonutho, mawdacla du İran gdımdawım dsoyım hçome cal nişe İsarloye bu maşıqlo dıbqamuthayna, u mırla “bu zyudo dkulle a’tehdide du İran ba n’atharwotho şbobe di çuğrafyayde ne, ukito ste tehdide la socure tursiter İsarloye bu madınho mescoyo”.

Camgabıdathe, u tboco froso İsarloyo mawdacle du gayso dı Tel Aviv gıdmabde tedbiqat folhoye rabe bu athro d’Qufrus bu qayto dıbqamuthayna xıd falqo ma tedbiqat du gayso İsarloyo dıkmisomi bu ışmo “a’tedbiqat du yarho du qrobo”.

A’tedbiqatani dgımdawmi hedor d’şawco yawme, gıdmıştawtıfilın haylawotho dilonoye, u haylowotho oyaroye udu yamo. A’tedbiqat du “yarho du qrobo” gawonoyith gıdgurşi arbac şabe, u kmıhşowi a’duroşo qamoye dıkmisomi bu şıklano bu makthabzabno du gayso İsarloyo. A’duroşani gıdobi aftho la folhe İsarloye dcayşi b’gawıd d’zabno mbayno i aykanoyutho du qrobo.

Ba duroşani ste kito tahrazto folhoyto ham la gbine du garbiyo udu taymno d’İsroyel, u hamıste lu qlimo di Diffa Macırboyto da Fleştoye.

Meqım mathe, mşalo İsarloyo b’darğo celoyo mzaharwole dı Tel Aviv gıdurşo hın tahrazyotho xıd funoyo lu İran, in du rişono d’Amerika Joe Biden dımnaqe u darbo du dcoro lu qyomo du nukler di şato da 2015.

Bebzabno, hın mşale Amerikoye bi maqırhonutho dhulın li dafo d’Politico, maglelın li holo di mdabronutho d’Biden kıtla mabco dımqadmo bi şabthathe insiyativ hatho, bnişo dmitabde bazare cam Tahran. Lfuth hın mabuce, ktio texmin d’Amerika gıdtılbo mu İran dmanqıs a’fulhone du nukler mqabıl du texifo dhın ma tedbire momunoye dmahti acle.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…