İsroyel simla Fransa u Britania tehdid bi sbutho di mawdyonutho bu athro d’Fleşt

URISLEM – U waziro di baroyutho d’İsroyel Jadcun Sacer, bi maqırhonutho dhule li sferyawmo d’Yasrayil Hyum, mawdacle dkul dawse ihidoyto dıkmimodo mqabıl d’İsroyel, gıdmimıd bhaq dida dawsat hrene ihidoye mi xasra d’İsroyel, u grışle u zuhoro cal Tel Aviv dkıtla mabco dmahto ido cal arcotho da Fleştoye in dothe dmitıctarıf emwothoyith bu athro d’Fleşt. 

İ sferyawmo mawdacla ste d’Sacer mhadadle an’athrawotho dkıtlın mabco dmıctarfi bu athro dı Fleşt, baynothaye Britania u Fransa, u mırle “i dawsathe gıdmitahwela funoyo mi xasra d’İsroyel dgıdfırso i moruthayda cal bote İsarloye dıbnın bi fnitho di Diffa Macırboyto ub’Ğour d’Yurdnon”. 

Yasrayil Hyum mawdacla ste du tehdidano d’Sacer athi luhwoyo bu taro da fulhone dıkmisomi ucdo bi rişonutho du rişqutno dı Fransa Emanuwel Macron, dmitayıb lumodo emwothoyo b’Newyork bu mesco du yarho d’Hzirın dıbqamuthayna, bnişo dmitaltım mawdyınwotho emwothoye bu athro dı Fleşt bu snodo di Scudiye. 

İ sferyawmo grışla ste u zuhoro cal Amerika dhula xabro l’İsroyel dlıgıdmıştawtıfo lu lumodano d’Newyork, elo bebzabno lıgıdsaymo hboso ftiho cala n’athrawotho hrene laşan dlımıştawtıfile. 

M’gabo hreno, u waziro di baroyutho d’İspania Xosse Manuwel Albares, mawdacle du kenşo emwothoyo klozım dmahıt tedbire cal İsroyel, laşan dmakılyo u qrobayda b’Ğaza. Albares tlıble ste dmitahıt mnoco emwothoyo calu şedoro da zayne l’İsroyel.