İsroyel sımla hçome hathe cal Suriya

İsroyel sımla hçome oyaroye hathe cal Suriya, ukmisım taxmin rabo dmıdla naqla hreto a haylawotho İranoye nişo la hçomayda.

Hano uhçomo trayonoyo dıksaymole İsroyel cal Suriya b’gawıd du yarhano.

Kamhwe d’İsroyel b’fusqono kamiloyo dımdawmo dımcaqbo a’haylawotho İranoye b’Suriya lfuth tahrazto dhani kmo ışne dımbaynola. Adyawma, u gayso du rejim d’Suriya mdacele dnafıq mqabıl da hçome İsarloye hathe cal Darımsuq, elo lule mawdconutho cala dukotho dıhçim aclaye m’İsroyel dıkmisım texmin rabo dmıdlın a’haylawotho İranoye nişo elaye. Balhude buyono folhoyo mathkarle dı tayisyotho İsarloye du qrobo fayiri lalcıl da turone du Golan, laşan dmohın nişe mbayne qariwo m’Darısmuq, wu buyonano ste mdacele di mudafaca oyaroyto du rejim madrela a’soruhe d’İsroyel kulle.

Elo hın ma comure di duktho, mawdaclın l’Reuters dşamici qole qawye bi xasra taymnoyto dı Darımsuq dkiba kmoyutho rabtho d’grube İranoye mzayne.

Camgabıdathe, u gayso İsarloyo lule mawdconutho calu hçomano u haroyo, elo mşale folhoye İsarloye b’darğo celoyo, mawdacwolın meqım da hçome dıkmisomi cal Suriya kıtlın u nişo dmatimi i ithutho folhoyto dı Tahran.

A’grube mzayne du İran ksaymi u duyoqo d’fenyotho rabe bu madınho, bu taymno ubu garbay macırbo d’Suriya, ud’ğalabe qastrat dıknıfli hedor dı Darımsuq.

Ba yarhe haroyani, İsroyel maqşela a’hçomayda cala nuqazyotho İranoye ucala bnayqyomaththe dkıtne b’Suriya.

57 folhe du rejim uda grube mzayne du İran, qtıliwo ba hçome İsarloye dısmiwo 13 bu yarho d’Konun u Haroyo dşaficina cal cambare da zayne u nuqazyotho folhoye bu madınho d’Suriya.