İsroyel sımla hjomo hatho cal Suriya

İsroyel sımla hjomo hatho ba soruhe cal nuqazyotho du gabo Lebnonoyo d’Hizballa u calu grub di mudafaca oyaroyto d’Suriya.

 Ba hjomani dsimi qariwo mi erişkoyto dı Darımsuq, qtil u mjarıh menyono ma folhe d’Hizballa u du rejim.

 Adyawma ba şoce d’fothıdsafro, sim hjomo İsarloyo hatho cali fnitho d’Alzabadani bu athro d’Suriya dkıtyo qaruto ma thume d’Lebnon. Calu hjomano i mşatasto d’Suriya da zedqe noşoye mawdacla d’İsroyel ba soruhe dımhela ma narcothayda mu garbiyo di mditho d’Aljalil, mafrqacla cambare d’soruhe u buğre du gabo Lebnonoyo d’Hizballa u da grube mzayne noqufe du İran bi fnitho d’Alnabi Habel dkıtyo hedor di mditho d’Alzabadani. Acmabarani dımfarqıci hfirene b’gawıd du turo, u bi netije da hjomani dsimi qtil u mjarıh menyono ma folhe d’Hizballa uda grube hrene mzayne dıkmısnodi mu İran.

A’cambare du zayno u da buğre du gabo d’Hizballa u da grube hrene mzayne du İran, bu zyudo dkulle kowın ba turone di fnitho d’Alzabadani dkıtne qariwe ma thume d’Lebnon. A cambarani kmitıstacımli mu gabo d’Hizballa xıd nuqazto meqım mıdnoqıl azayne wa buğre dıkmişadrilene mu İran la narcotho d’Lebnon.

Camgabıdathe, asoruhe d’İsroyel sımlın hjomo calu grub di mudafaca oyaroyto du rejim d’Suriya dkıtyo bi fnitho d’Alzabadani, bu zabno dımnasele u rejim dnofıq mqabıl du hjomo İsarloyo. Ubi netije da soruhani dımhın, qtil folho mdu rejim u mjarıhste hamşo hrene, baynothaye tre dkıtyo i aykanoyuthaththe bu qento.

Uhjomano dımakıd mu ajans d’Sana, i şultonutho d’İsroyel lula maqırhonutho ruşmoyto acle hul ucdo, u balhude malolo bışmıd du gayso İsarloyo mırle l’Frans Press “ahna lıkobina fuşoqe cal taşrore dıkmıfrosi mu tboco froso nuxroyo”.

U mede dıkgorış u zuhoro bu hjomano, ahaylawotho Rusoyewın dkıtwın rahuqe balhude kımo mowat d’mitrowiye ma cambarani dımfarqıci. Wu medano kmagle cali sdirutho qwitho dkito bayn d’Rusya u İsroyel bu zabno dıkmisım hjome cal Suriya.

Meqım mathe, İsroyel bu hjomo dsımwola yawme d’hamşo dşaficina ba şoce d’fothıdsafro cali fnitho d’Misyaf b’Suriya, qtılwo ışto farsufe ma grube mzayne nuxroye dkıtne masre camu İran.