Jeffry u MacGurk mayade u taşroro da buqore d’Emwotho Mhaydotho

Amerikaste mayadle u taşroro di sictho şritho da buqore d’Emwotho Mhaydotho, u krıhla kul hawbo dıkmisım mayna grub aw haylo zaynoyo dhowe b’gawıd d’Suriya.

 Camgabıdathe, u mathlono Amerikoyo dmeqım du koalisyon emwothoyo mqabıl Dacış Britt MacGurk, sımle sturyo qaşyo u rişono d’Amerika Donald Trump cal dıgrışle ahaylawothayde mu garbay madınho d’Suriya, u hule aftho l’Turkiya dsaymo hawbe mqabıl da came di fnitho.

 U mathlono dilonoyo du rişono Amerikoyo b’Suriya Jeyms Jeffry, bu buyono dıfısle, mawdacle du taşroro di sictho mbaqronitho d’Emwotho Mhaydotho kmamte lu bolo du kenşo emwothoyo klozım dmoyıd hşowo mu rejim d’Suriya mqabıl da hawbe u da dyoşe dıksamlın bhaq du camayde. Jeffry makadleste d’Amerika kıkırho a gunhe wa dyoşe dıkmisomi bu haqlo da zedqe noşoye mayna haylo aw grub zaynoyo dhowe b’gawıd d’Suriya.

Bebzabno, u mşalo Amerikoyo tlıble ma hayle mathrone calu kriz d’Suriya dımhalqi dawsat msimone bnişo dmınfıq mqabıl da hawbani dıkmisomi.

Megabo hreno, u mathlono Amerikoyo dmeqım du koalisyon emwothoyo mqabıl Dacış Britt MacGurk, bi maqırhonutho dıfrısle bi dafayde du Twiter sımle sturyo qaşyo u rişono d’Amerika Donald Trump u mırle “Trump bıthır mdıtrewole u garbay madınho d’Suriya u maslamwole i duktho l’Putin u l’Erdoğan mırwole dmede lıgıdhowe bu qlimano. Elo lfuth u taşroro hatho d’Emwotho Mhaydotho, agunhe du qrobo, du htofo, du qatlo, du tenhibo u di golutho zayidi ba fenyotho dıgrişi afolhaydan menaye”.

MacGurk mırleste “ahaylawotho Amerikoye dkıtne ucdo b’Suriya latne lu sutoro da bnaynoşo, u latne tamo laşan dımharbi Dacış, elo lfuth Trump ahaylawothaydan laşan u sutoro du naftone b’Suriya. Ucdo ahaylawothaydan kmisım aclaye hboso, u naqlat khozın husrono ma haylawotho Rusoye mu zabno dhuwole Trump amro dmıgroşi ahaylawothaydan me Suriya”.