KCK mawdacle Turkiya dmıstacmela ğaz kimyawi calu gerilla

Me gabo hreno u malolo du Huyodo da Kenşe d’Kurdistan-KCK maglele, d’Turkiya mıstacmela ğaz kimyawi calu gerilla, bu zabno di hamle hathto dmabdele u gayso kaboşo du atrho aclaye bu garbyo du Iraq.

Mawdıcste d’hathe latyo inaqla qamayto d’Turkiya kmıstacmılo ğaz kimyawi calu gerilla di PKK bu garbyo du Iraq.

İ dafo d’NRT du qlimo d’Kurdistan du Iraq, sımla athmıl maqıblonutho camu malolo di KCK Zagros Hiwa dkıtyo u malolo di KCK. U malolo mawdacle, d’Turkiya naqla hreto mıstacmela ğaz kimyawi cala Mharbonathe bu zabno da cuqobe haroye dsımla aclaye bu garbyo du Iraq.

Lfuth Sagros Hiwa, u gayso kaboşo d’Turkiya mıstacmele 3 naqlat zayne kimyawi calu gerilla b’3 yawme frişe ba cuqobe dsımlın a tayosyothayde cal Avaşin dkıtyo bi hiğmonutho d’Nuhadra. Hiwa lo mawdacle mın şıkıl d’mluwe kimyawi mıstacmıl mqabıl dıthe elo m’akadleste, d’hathe latyo inaqla qamayto.

Ba hamlat hrene dsımla Turkiya bu dacbar calu gerilla di PKK, mıstacmele u gaysayde zayne frişe dkıtne mnice lfuth a qonune Emwothoye-dilonoyith bu zabno di hamle dsimowa bu yarho d’Şbot dşafıcina cala turone d’Gare.

Bu zabno da cuqobe haroye dıkmisomi bu garbyo du Iraq, kınofıq taxtuşe qaşye beyn du gayso Turkoyo udu gerilla di PKK. Elo holucdo’ste lo mbahıs en qtil mdinoye ba taxtuşani, elo bi hamle dsimowa b’Şbot-qtılwo 12 mdinoye.