Kımdawmi ahjome cala qeryawothe du cameydan bu Iraq

A tayosyotho du qrobo d’Turkiya sımlın hjome oyaroye hathe cal menyono ma qıryawotho du camaydan bi qastra d’Zaxo bu garbiyo du Iraq.

 Lfuth mabuce me Zaxo, u husrono dhawi bi netije da hjomani belhude momunoyoyo.

 Mabuce mi qastra d’Zaxo mu garbiyo du Iraq, mawdaclın da tayosyotho folhoye d’Turkiya sımlın athmıl hjomo oyaroyo cala dukotho dıknıfli calu thumo di qritho d’Bersavi dıkruhqo 20 kilometre mu garbiyo di qastra d’Zaxo.

Lfuth hın sohude, u hjomo dsim cali qritho d’Bersavi ucala qıryawotho dhedora qaşye wın, wa cayme du dexono mkasewolın i şmayo da qıryawothani, mawxaste nafıl zuctho rabtho beyn da comure di duktho. Bebzabno, cayni mabuce mawdaclın bi netije da hjomani hawi husrono la benyone u mulkone da qıryawotho, elo lfuth a taşrore difrisi husrono di nafşo lawi beyn da mdinoye da qıryawothani.

İ dafo d’Caynkawa athmıl ban esore dhawila cam comuro mi qritho d’Sanat bi qastra d’Zaxo, makadle di qritho dı Daştax dıknıflo cala thume d’Turkiya, u dıkhoyın eba a galwoye du camaydan lo sim hjomo acla, u noşo lo mgalwele mena.

A hayle kaboşe d’Turkiya, mabdelın hjome folhoye calan arcotho du garbiyo du Iraq, bi dacwa du nfoqo mqabıl du gerilla di PKK, u bnişo dımşatsi nuqazyotho folhoye Turkoye hathe bi fnitho.

Calu hjomano dıkmisım calu garbiyo du Iraq, u fatıryarxo di cito Kaldoyto d’Bobıl Mor Luis Rofayel Sako bi maqırhonutho dhule lu ajans d’Fides du Vatikan mırle; İ aykanoyutho şğuştoyo, ukmibahıs dıqtil bu noquso hamşo mdinoye u menyono celoyo mgalwelın. Wu nişo du rişathro d’Turkiya Erdoğan holucdo latyo idico. İ şultonutho du Iraqste latla aftho dsaymo qrobo mqabıl dı Turkiya. U mawxa khozina ruhayna dıkloqina b’qetre dkibın zıd qento.