Kito fulhone laşan docır u cameydan u galwoyo l’Kerxeslox

U froshezwo Iraqoyo d’Alhurra, bu taşroro dfrısle cala Mşihoye d’Kerxeslox, mawdacle dkito folhone mi xasra di cito u mi xasra di şultonutho du Iraqste dkımşaçci u camaydan dkıtyo galwoyo ba nathrawotho şbobe dıdocır mehatho la fenyothayde.

 Mxasra hreto, u ajans da tebe d’Asyşeyted Press bu taşroro dıfrısle mawdacle da Mşihoye du Iraq lıkhozın dkıtlın aftho dmişahılfo i aykanoyuthaththe bıthır mi socurutho dsımle u papa Mor Fransis lu athraththe.

 Bi hiğmonutho d’Kerxıslox mşarelın fulhone m’gabe mşahılfe, laşan dmitadcıri a’Mşihoye galwoye la fenyothaththe bıthır mdıtrelın i hiğmonutho wu Iraq mi celtho da tehdide di mşaynutho. Ba melani mşarele u taşroro dıfrısle u froshezwo Iraqoyo d’Alhurra dmaglele dkito rişone citonoye dıkfulhi ucdo laşan dmitarso i aykanoyutho gawonoyto du Iraq.

Rep: “mşarelan dfulhina laşan dımcadlina i aykanoyutho du Iraq bu haqlo folitiqoyo, momunoyo u kenşoyo. Wu papa Mor Fransis bi socuruthayde l’Bağdede huwwole egartho du tedawi gıdgorış zabno”.

U taşroro du froshezwo d’Alhurra mawdacle camgabıd di cito kito ste fulhone mi xasra di şultonutho laşan dmitaqimi a’qetre dkito b’qamuthıd du dcoro da Mşihoye, baynothaye dmihalıq dawsat towe bi sbutho da mulkone uda n’arcotho kbişe.

Rep: “i wazirutho di galwoyutho gıdşıryo a’qetre u gdımqadmo a’mkone dkito laşan u dcoro da Mşihoye. Kito hın bore kbişe u kito ste qetre di mdabronutho u qetre hrene dkıtne masre cama hiyoywotho. Gıdsaymina u mede dıknofıl aclayna, bnişo d’gurşina alfu Iraq a’Mşihoyayde”.

Lfuth u taşroro d’Alhurra, i socurutho dsımle u papa lu Iraq trele athare qrihe bi nafşo da Mşihoye du athro, u cılmıdmathkarlın i casqutho dcayşiwola ba n’ışne dşaficina, elo naqla hreto makadlın i masiruthaththe camu Iraq. A’istatistike citonoye kmawdıci du menyono da Mşihoye dımgalwelın mi hiğmonutho d’Kerxıslox bıthır mi şato da 2003 şafici u thumo da 50% mu menyonaththe u gawonoyo, u hathe ste mi celtho di aykanoyutho folitiqoyto udi mşaynutho, umu tathir dhın ma gabe folitiqoye cali aykanoyutho gawonoyto du athro wu bırbozo dı Dacış. İ cito du Iraq bi hzaytayda menyono celoyo mu camaydan dkıtne ucdo galwoye ba n’athrawotho d’Lebnon, Suriya, Turkiya u Yurdnon kibe dımhalqi i dawse qamayto du dcoro lu Iraq bıthır mi egartho du sabro dhuwwole u papa bi socuruthayde i makthabzabnoyto.

M’gabo hreno, u ajans da tebe d’Asyşeyted Press d’AP bu taşroro dıfrısle mawdacle da Mşihoye dfayişi bu Iraq lıkhozın dkıtlın aftho dmişahılfo i aykanoyuthaththe bıthır mi socurutho dsımle u papa Mor Fransis. AP dımşalatle u bahro cali surto kımto dkito ucdo sa Mşihoye du Iraq, grışle ste u zuhoro cal Duha Sabah Cabdalla dlaqila u papa bi socuruthayde l’Bağdede. Duha dımvayacwola u w’abro bu hçomo dsımwole Dacış calu baytayda i şato da 2014, mawdacla dkıtla keşlo şek dmişahılfo i aykanoyutho du camaydan bıthır mi socurutho du papa, u mırla “u papa latle i hatro d’Muşe ulaybe d’şore i casqutho da qetraydan. İ naqla dqathli aftho dnıfqono, gıdtıryono mu Iraq”.