Kito hfuxye mqabıl du hjomo dıkseymo Azerbaijan calu camo Armınoyo

Ahsayo di cito d’Madınho d’Othuroye d’Amerika, bu buyono mşawtıfo dıfrıslın, krıhlın uhjomo bcelıdbobo dsımla Azerbaijan calu camo Armınoyo b’Nagorno Qarabax, u tlıblın mu kenşo Emwothoyo dfolıh, bnişo dmitaklın a taxtuşe bu qlimano.

 Camgabıdathe, i marcitho di cito Armınoyto Orthodoksoyto du Iraq maqımla teşmışto bi mditho d’Caynkawa cali ruho dan Armınoye dbızlın u admathe bu cafro d’Qarabax.

 A rişone da marciyotho di cito d’Madınho d’Othuroye b’Amerika, hasyo Mor Aprem Xamıs, hasyo Mor Awa Royil u hasyo Mor Bulıs Benyamen bu buyono mşawtıfo dıfrıslın, mahwelın u hfuxyathe mqabıl da hjome dsımla Azerbaijan calu qlimo d’Nagorno Qarabax. Bu buyono ahsayo du camaydan mawdaclın du hjomo bcelıdbobo dcalu qlimo şaryo d’Qarabax xlıqle haşe calu camo Armınoyo dlatle htitho, u makadlın du hjomano kdoyış a prensibe noşoye, aqyome Emwothoye wu zedqo du camo dhuwe dımbayın u qadar d’ruhe.

Bebzabno, mawdıc dıklozım u tukoso d’Emwotho Mhaydotho dmakle uhjomo bcelıdbobo d’Azerbaijan u dmonıc kul şıkıl d’mudaxala baroyto dıkmisomo leşan a yuthrone dhın athrawotho. U buyono mawdacleste dıklozım u kenşo Emwothoyo dkorıh uhjomano u dfolıh, bnişo dmitaklın a taxtuşe u dmitabde dialog u şbuqyo beyn da 2 athrawotho şbobe. Camgabıdathe, ahsayo grışlın u zuhoro cala esore maktabzabnoye dkımdawmi beyn du camaydan u dan Armınoye hani alfayo dışne, u grişste u zuhoro cala citotho u qıryawotho Othuroye dıksundi i ithutho Othuroyto b’Armenya.

Ahsayo di cito d’Madınho d’Othuroye bu buyonathe mırlınste; Xıd wolitho Mşihoyto knofıl aclayna dnufqina mqabıl du cnufyo u di bcelıdbobutho dıkmisomo cal Armenya me Azerbaijan. Mxasra hreto, u rişono di marcitho da Armınoye Orthodoksoye bu Iraq hasyo Mor Afak Asadoryan maqımle teşmışto cali ruho dan Armınoye dıqtili bu qrobo dkımdawım ucdo b’Qarabax. Li sluthathe dımtaybo b’Caynkawa, mıştawtafle a kohne da marciyotho di cito Armınoyto bu garbiyo du Iraq wu izgado Armınoyo b’Arbil Arşak Manokyan.

Hasyo Asadoryan bu mamlo dsımle, mawdacle du qrobo dıkmaşyo Azerbaijan bu snodo d’Turkiya cal Armenya, latyo qrobo tawdithoyo aw umthoyo, elo qrobo di hirutho u dmidawmi i ithuthatheyo. Camgabıdathe, u izgado Armınoyo bu mamlo dsımle mawdacle dhıne xıd Armınoye gdımdawmi u ağunathe leşan i hirutho wi icyeşe b’nasihutho u loste gdobın ruhaye qurbono lu sutoro du cafrathe u maktabzabnoyo.