15/07/2020

Kito nişo dmihathıtho i Daşto d’Ninwe

İ şultonutho du Iraq mawdacla dkıtla sdirutho camu bank emwothoyo dıbritho, bnişo dmisım u hethotho di daşto d’Ninwe wi fnitho d’Şigur dıshifi ba hjome dsımwole u tukoso marıhbono dı Dacış cal Ninwe i şato da 2014.

 Lfuth i wazirutho di galwoyutho du Iraq, i dawsathe gdımsarhıbo bu dcoro da galwoye la fenyothathe a şerşoye b’Şigur ubi daşto d’Ninwe.

İ wazirto di galwoyutho bi şultonutho du Iraq İvan Faeq Jabro, mawdacla dkito sdirutho bayn di şultonutho d’Boğdod wu bank emwothoyo dıbritho, bnişo dmisım u hethotho di daşto d’Ninwe wi fnitho d’Şigur.

Jabro bi maqırhonutho dhula athmıl li sferyawmo d’Alsabah Albağdadiya mırla “kito udco sdirutho dmitadcır mehatho u hethotho du benyono tahtoyo di daşto d’Ninwe u d’Şigur, baynothaye u hethotho da qentrune du hulmono, du kahrobo u da maye. U medano gıdmisım bu snodo du fond kenşoyo du quyomo ubi methcadronutho du bank emwothoyo dıbritho”. Jabro mawdaclaste du medano kmisım lfuth u mabco dkıtlın acomure di daşto d’Ninwe u d’Şigur dıdıcri la botathe, u hawxa mdawamla “i wazirutho di galwoyutho ksaymo ucdo u mede dıknofıl acla, bnişo dsındo a’yaqrotho dkıbci dıdıcri la botaththe. İ waziruthayda gdobo tarmiyotho nacime la yaqrotho dacore la fenyothathe, bnişo dmitaqwın aşartat di ciyeşathe tamo”.

Bebzabno, i wazirto Kaldoyto Jabro mawdacla du snodo da fenyotho şerşoye da galwoye, gdımsarhıb u dcorathe li daşto d’Ninwe u l’Şigur, u makadlaste di wazirutho di galwoyutho kfılho ucdo laşan dmitaqimi acelotho rişoye dkowın tırpılto qum du dcoro da galwoye la fenyothathe dilonoyith u benyono tahtoyo dıshıflın amarıhbone, agade du fulhono wi şawyutho bayn da dacore.

Megabo hreno, u notarrozo gawonoyo du gabo d’Bethnahrin Demoqratoyo Romyo Hakkari, mıstaqbele athmıl bu qentrunayde b’Arbil, u waziro dıkhoyır cala sebwotho da came bi şultonutho du qlimo d’Kurdistan Aydın Macruf. Bi ytawtathe, drişi azedqe umthoye u tawdithoye da came du qlimo, u aydarbo kibe dhowın mıştawtfone hfite ba şutose ruşmoye di şultonutho u bşıkıl dıkşowe lu makthabzabnathe u lu ağuno dhulın bu haqlo umthoyo u tawdithoyo du Iraq.