Kito şabake b’Turkiya dıkmıstacmılo a tahwiyotho ruşmoye catiqe du camaydan dıkhoye ucdo bi golutho

Magle, dkito şabake b’Turkiya dıkmıstacmılo a tahwiyotho ruşmoye catiqe du camaydan dıkhoye ucdo bi golutho, leşan dımawfıqo nufuse u passaporte mzawre-saxta.

Calathe sim qroyto lan abne du camaydan dkıtne me Turabdin, dhowın mahise.

Lfuth i mawdconutho dmıdlan me Elias Maraha dıkhoye b’Almanya, magle dkito şabake b’Turkiya, dıksaymo nufuse u passaporte saxta. Hathe nafiqo li holo meqım kmo şabe, bıthır mıd farsufe mi iqartho d’Elias Maraha dkıtne bu şerşo me Tamarze, dmahıt ido calu nufusathe u mşahlıfi u mahti b’ışme dfarsufe hrene.

U ışmo triso’yo bu nufusano, elo i sırto d’farsufo hreno’yo ubu şıkılano, kibe u nufusano dmitıstacmıl mqabıl di iqartho dbe Maraha. Awkith kito qento, dmitahıt u mal u mulk di iqartho cal ışme du nuxroyo. Cayni hile hawi cam 4 farsufe hrene man abne du camaydan dıkhoyın b’Göteborg du Swed u farsufo hreno b’Almanya.

U mede dıkgorış u zuhoro da nufusani dmıstacmıli, man abne du camaydan dıkhoyanwo meqım ba mdinotho rabe du tayman madınho d’Turkiya-xıd mathlo Mırde uğer. Hathe’ste cal dkıtyo mdito rabtho, u tehqobo u sefoyo du şwolano kowe ğalabe yaqırtır.

Bi sbutho da fulhone di şabakathe, Elias Maraha hawile esore cam powelıs u mşale frişe d’Hazax, Mırde u Tamarze leşan dımtaqıbi i sbuthathe u bebzabno, huwle xabro la farsufe hrene du camaydan dmıstacmıli a warqathe bu Swed ubı Almanya. Bu şıkılano, grışle Elias Maraha u zuhoro du camaydan dıkhoye bi golutho’ste, dhowe mahiso mqabıl da camlani.