Klozım dmisım hboso rabo emwothoyo cal Turkiya

U gayso athronoyo d’Libya mawdacle dı Turkiya kımdawmo adyoşayda b’Libya cıl mdu qyomo dımdela i sictho folhoyto b’Çenev.

 Bebzabno, u gayso athronoyo d’Libya mawdacle di mudaxala Turkoyto lıgıdkılyo ida dlımisım hboso emwothoyo rabo cal Anqara.

U malolo du gayso athronoyo d’Libya rabhaylawotho Ahmad Almismari, mawdacle du qyomo di sictho folhoyto d’Çenev ksoyım u garanti di mşaynutho du athro udu nfoqo du moro li morutho di şultonutho, ubebzabno u qyomo kmawfıq a’mharbone nuxroye kulle m’Libya baynothaye a’folhe dı Turkiya.

Almismari mawdacle ste ida du qyomo d’Çenev ida dmiqadamle b’şıkıl msimono, kibe dxolıq arcutho tawto dıkşuyo lu şroyo da qetre hrene folitiqoye u momunoye.

Camgabıdathe, Almismari mawdacle dı Turkiya hul adyawma lımaklela a’dyoşe dıksaymolın b’gawıd du athro d’Libya, u mırle “bıthır mıdşafıc 24 şoce calu qyomo d’Çenev, fris surotho l’folhe Turkoye dıksaymi duroşe l’grube mzayne bi mditho dı Tarablos, udilonoyith bi maşritho di mudafaca oyaroyto bi fnitho d’Kajura, uba surothani kmahwe ste zayne u alat u radoyotho folhoye dı Turkiya, wu medano kmıhşu dyoşo ğalabe rabo b’Libya”.

Bebzabno, u malolo du gayso athronoyo d’Libya Ahmad Almismari krıhle i maqırhonutho dsımle Erdoğan calu qyomo d’Çenev, u mawdacle du mamlayde dalqubloyo lu kuşoro du qyomano. Mawxa ste Almismari makadle dı Turkiya lıgıdmakılyo a’dyoşayda b’gawıd d’Libya ida dlımisım hboso emwothoyo rabo acla.