Klozım dmisım şuhlofo momunoyo laşan dmifıt u kriz dıkmicış bu Iraq

U menyono da farsufe dıqtili ba tagılyotho du protesto dkımdawmi bi Sulemaniye bu qlimo d’Kurdistan du Iraq, yasıq lı tmınyo farsufe u zıd me 50 hrene mjarhi.

 Atlotho rişone du Iraq cama rişone da gabe folitiqoye mşahılfe, bu knuşyo dsımlın bı Boğdod, makadlın dıklozım dmisım şuhlofe momunoye bnişo dmınfıq mqabıl du kriz qaşyo dıkşofıc ebe u Iraq.

 Lfuth u istatistik dıfrısle u komisyon celoyo da zedqe noşoye du Iraq, u menyono da mtagılyone dıqtili ba protestawiye di Sulemaniye yasıq l’8 farsufe u 54 hrene mjarhi. Yawme dıtre bıthır mu qatlo dı mtagılyono dmarıswo acle buğre bi qastra d’Jamjamal, qtılwoste tıre mtagılyone hrene b’2 fenyotho mşahılfe ba şoce du lalyo. U yawme dı tlotho, i sictho celoyto da zedqe noşoye d’Boğdod bi maqırhonutho dhuwola, makadwolın u qatlo d’3 mtagılyone hrene bı dukotho frişe bi hiğmonutho di Sulemaniye bu garbiyo du Iraq.

Athmılste, u rişqutno du Iraq Barham Salıh, u rişwazire Mustafa Alkazimi wu rişono du parlamento Muhammad Alhalbusi cama rişone da gabe folitiqoye mşahılfe du athro, sımlın knuşyo mşawtıfo dı drışlın ebe u kriz momunoyo du Iraq wa gedşe dhawın bi Slemaniye. Bu buyono du huthomo dıfrıslın a mıştawtıfone, mawdaclın da şuhlofe momunoye u şroyo towo dkuleyo li aykanoyutho du Iraq bu taro du kriz du virus d’Corona. A mıştawtıfone lu knuşyano mahwelınste u snodathe la tedbire dgıdmaydo i şultonutho d’Boğdod, bnişo dmisım şuhlofe momunoye bi tarmitho du qonuno di butja da 2021. Camgabıdathe, a mıştawtıfone mahwelınste u snodathe lu dewam du dialog beyn di şultonutho qentrunoyto d’Boğdod wi şultonutho du qlimo d’Kurdistan, bnişo dmışrın a qetre dkito baynothaye.

Mxasra hreto, u rişwazire di şultonutho d’Arbil Masrur Barzani mawdacle du qetro dan ağre awkith da mcaşe, hawi celtho dnofıq ruğzo camonoyo bı taxtuşe u bulbolo dheş kımdawım. Barzani bu mamlo dsımle athmıl, mawdacle du athro kule kşofıc b’maşıqlo casqo, u makadle dgıdmıflıh cam Boğdod, bnişo dmışroyi a qetre dkıtle camu qlimo d’Kurdistan. Barzani sımleste qroyto dmınfıq moro li mşaynutho du qlimo kule, u tlıble mi şultonutho qentrunoyto d’Boğdod dşuryo u kriz da mcaşe.

A mtagliyone dhawilın ruğzo mqabıl di aykanoyuho harıwto du momuno, i batilutho da şuğlone wu dlıkmitahwe u ağro u mcaş da fqide kımdawmi a tagliyothathe bi Suleymaniye u bı Halabja. Ba tagliyothani dıqtil u mjarıh ba casrowat dfarsufe, mahıtwo mnoco du nfoqo calu camo. Elo a mtagliyone naqla hreto kımdawmi dmahwın ilo thınihuthathe cali aykanoyutho du qlimo du garbyo du Iraq.