16/09/2020

Klozım urifi dmakliyo a droşeyda mqabıl du cboro dı Turkiya

Bu mamlo şatonoyo dsımla i rişonitho du mawtbo du huyodo d’Urifi Ursula von der Leyan mzaharla Turkiya bu qedomeyda li sbutho du yamo mıscoyo u mırla Turkiya a thumeyda xıd cografya kmotın l’Urifi elo ba dumyo dıksaymo ucdo Turkiya marhıqo ruha me Urifi.

 Bebzabno ba dıroşe dhawi bu parlemento du huyodo d’Urifi bu zyudo da mamle da qoyume mqabıl du rmoşo dı Turkiyaweyne.

Hani zabno kowe maqırhonwotho u droşe ma mşale d’Urifi mqabıl da zawce u da rmoşe dıksaymo Turkiya gawonoyith u bu Yamo Mescoyo dilonoyith.

Ba droşe dhawın athmıl bu parlamento d’Urifi bi rişonitho du mşalo da esore baroye du Huyodo d’Urifi Josep Borel, bu zyudo a qoyume ba mamle dsımlın mawdaclın ilo thınihuthathe mqabıl d’Turkiya u hın menaye mırlın; Urifi klozım maydo fusqone qaşye mqabıl d’Ankara xıd mathlo dmitaklın a mcadronwotho momunoye dıkmitahwela u dmitaklın a droşe du cboro d’Turkiya lu Huyodo d’Urifi bnaqla hıdo, hul d’Turkiya dımşahılfo i hzayteyda.

Ba mamlathe a qoyume sımlın sturyo qaşyo Turkiya u mahwelın u snodayda  la 2 athrawotho hadome d’Urifi u Yawnan u Qufrus, dkito ducdo mwatyutho cam Turkiya dmatyo lı darğo du qrobo. Me gabo hreno bu mamlo dsımla i rişonitho du Mawtbo du Huyodo d’Urifi bi cohnutho dhawila şato dımnaqyo li wolithathe, kalyo calu qedomo d’Turkiya u mawdacla en dımdawmo Turkiya bu dımyano, gıdturyo da esore dmıqtoco acma bnaqla hıdo.

Ursula Von der Leyyen bu mamlayda mırla; Turkiya a thumeyda cam Urifi’ne elo ba zabne haroye u rmoşo wa zawce dıksaymo, kımarhıqo ruha ma esore dcam Urifi. Bebzabno klozım dmidıc, ahna gıdsundina anathrawotho hadome du Huyodo, en dhowe qrobo beyn elaye u Turkiya.

Von der Leyyen mzaharla Turkiya u mırla; Turkiya klozım dturyo ma tahdide dıksaymo lan athrawotho şbobe dkıtla hano latyo mede dıkmitaqbıl. Lfuth a droşe wa maqırhonwotho da mşale d’Urifi, kmahwe Turkiya krıhqo mu Huyodo.