Kmibıc dmişakıl koalisyon mqabıl du İran

U athro da İmarat Caraboye Mhayde u İsroyel matın l’awyutho dımşatsi koalisyon awkith dhowın bnayqıyome dıhdode mqabıl du İran.

Megabo hreno, u mawtbo da caşıryotho Caraboye du Iraq mawdacle da grube mzayne dıkmısnodi mu İran, i celtho du şğuşyo dkito bu haqlo di mşaynutho du Iraqne.

U waziro di baroyutho d’Amerika Mayk Pompeo bi maqırhonutho dhule athmıl lu tboco froso, mawdacle da İmarat Caraboye Mhayde u athro Caraboyo qadmoyoyo dıkmıctarıf bu zedqo dhowela İsroyel ithutho xıd athro la Yudoye, u grışleste u zuhoro cala tıre gabe İsroyel wa İmarat dmatın l’awyutho dımşatsi koalisyon awkith dhowın bnayqyome dıhdode mqabıl du İran.

Pompeo mırle “mede makthabzabnoyoyo u snoto dhawiwo lu diyalog bayn du rişwazire d’İsroyel Bınyamen Netenyahu u amiro d’Abu Dhabi şex Muhammad Bın Zayed. Wu qyomo du şlomo dımde bayn da tıre gabe mede makthabzabnoyo yo”. Pompeo mırleste “zıd me 25 ışne u mbayn da nathrawotho Caraboye kulle, a İmarat du athro Caraboyo qamoyoyo dıkmıctarıf b’İsroyel xıd athro mothonoyo da Yudoye. İsroyel u a İmarat kımqadmi lu İran xıd qento rabo. Matina ucdo l’awyutho d’bonina esore dkiban bu darbathe dımşatsina koalisyon, laşan u qentano dlımote la narcotho Amerikoye awste dsoyım husrono l’noşo bu qlimo du madınho mescoyo”.

Megabo hreno, u notarrozo gawonoyo du mawtbo da caşıryotho Caraboye du Iraq Thaer Albayati mawdacle du zayno dlatyo qonunoyo b’gawıd du athro u zayno da grube dıkmısnodi mu İran’yo, u mathkarleste dıklozım i şultonutho d’Boğdod dşıryowa agrubani amzayne.

Albayati bi maqırhonutho dhule lu tboco froso, makadle da grube mzayne dıkmısnodi mu İran, hınene amşale d’calu şğuşyo dkowe bu haqlo di mşaynutho wa  hjome dıkmisomi cala qentrune ruşmoye u diplomasi du Iraq. Albayati bi maqırhonutho dhule lu froshezwo d’Alhadath mzaharleste da gurube mzaynani u qento rabo dkulene bu wahdo du Iraq.

İ şultonutho du rişwazire Mustafa Alkazimi, mabdela cuqobe du kroxo ba mdinotho d’Boğdod u d’Albasra, bnişo dhowe u zayno masro belhude cami şultonutho, u dmitarkuw u qonuno b’gawıd du athro. A cuqobani walaw hul ucdo netije rabtho lımhaqaqlın, elo u camo Iraqoyo mayadle a’cuqobani, u mawdacle dkıtne dawse qamayto lafu froso di morutho di şultonutho.