Kmıdrış aydarbo gıdmıhkomi a hadome wa noqufe da ghrobe marhıbone d’Dacış b’Suriya

Kito ucdo renyo qawyo dıkmıdrış, cal aydarbo gıdmıhkomi a hadome wa noqufe da ghrobe marhıbone d’Dacış b’Suriya.

 Bu renyano kmıdrış, aydarbo gıdmitarhıqi a tloye mi tuxmonoyutho wa neşeste dmitawfıqi lqum du bethdino. U renyano mqadım lu droşo bi ytawto dhawyo beyn da mşale Swedoye udi taşdarto di Mdabronutho yothoyto u acmayeste u mşalo da esore baroye d’ESU Metin Rhawi.

U tbocofroso du Swed, grışle u zuhoro calu renyo dıkmıdrış ucdo, cal aydarbo gıdmıhkomi a hadome wa noqufe da ghrobe marhıbone d’Dacış bu garbyo d’Suriya. Bıgawe du renyano drişi a mkone dmitarxıqi a tloye mu radikalism uda neşe d’Dacış dmitawfıqi lu bethdino. U renyano mqadım u driş, bi ytawto dhawyo beyn du Swed uda mathlone di Mdabronutho yothoyto du garbay madınho d’Suriya.

U Swed’ste u athro qamoyoyo, dmıdle u renyano li ido u aydarbo u maşıqlo qonunoyo gıdmisım lanalfayo d’noqufe u hadome d’Dacış dkıtne ucdo ba maşıryotho d’Suriya. Bi ytawto dhawyo cami taşdarto di Mdabronutho yothoyto; beynothoye İlham Ahmed irişonitho zawgoyto du Mawtbo mşablono di Mdabronutho yothoyto ubi ytawtatheste, mathele u mşalo da esore baroye d’ESU Metin Rhawi u camaydan di Gozarto, u kıtwo u waziro di gawoyutho du Swed Mikael Damberg wi wazırto di baroyutho Ann Linde.

İ Mdabronutho yothoyto kubco dmibayın bethdino dilonoyo u dmınqoli a neşe Urifoye hadome b’Dacış wa nacimathe l’qentrun leşan a tloye dı qudri dızzın li madraşto u druhqi mi tuxmonoyutho. Damberg mırle; İ Mdabronutho yothoyto kubco dımqafyo şroyo gawonoyo-hem la neşe u hemste la tloye. En dothe u renyano dmişarır, i mıcnayde gıdmitawfıqi a neşe Urifoye lu bethdino; beynothayeste a neşe Swedoye.

İ wazırto di baroyutho du Swed Ann Linde’ste mırla; U renyano talab du floğo di mşaluthoyo u mede dhem u Swed u hemste ğer athrawotho kıfulhi acle’yo u calathe renyo intressantyo cal di Mdabronutho lıktulbo man athrawothani, dnuqli a tloye wa neşe bnaymothoye me tamo belhude inaqla dmiqadamlın talab ruşmoyo, gıdmitaslimi a farsufani lan athrawothathe.