06/09/2020

Kmitahwe hfuxyo mqabıl di şultonutho d’AKP

U zamoro barmothoyo idico d’Turkiya dkıtyo bu şerşo Kuırdoyo Nihat Doğan,  bıthır mıd sımle sturyo i şultonutho d’Erdoğan, u tboco froso wa farsufe dkıtne cam Erdoğan mşarelın dhıjmi acle bşıkıl qaşyo.

 Me gabo hreno grube tuxmonoye d’Turkiya mhaqarlın u hjımlın cala neşe Kurdoye falohe b’Sakarya dıkmaltımi u fıstaq.

 Nihat Doğan kıtyo zamoro idico u naqlatste mahıtle klayotho u frısle  maqırhonwotho bı sebwotho mşahılfotho. Bu zabno haroyo ba mamleyde mşarele dı gorış u zuhoro cali sbutho Kurdoyto u da came hrene, u dsoyım sturyo i şultonutho dlıkımhalqo dawsat bu haqlo di demoqratoyutho, bi hirutho du maftahfemo u ba zedqe du leşono emhoyo u ğer sebwotho.

Bi tahrazto dıha ma foshezwo d’Turkiya u zamoro Doğan sımle sturyo qaşyo i şultonutho d’AKP dmeqım kıtwole hzayto tawto acla u mırle; U gabo d’AKP mşatıs calu asas di demoqratoyutho, di rwihutho udi hirutho du maftahfemo u ğer. Elo bıthır qawın u trelın ma sebwothani kulle u mşarelın dmıstacmıli a came dkito bu darbo qamoyo a Kurdoye.

Doğan bu mamleyde mırle; Qay Selahattin Demirtaş bu hbuşyoyo u ba casrowat folitiqoye qay mınyo u fawdathe dakbar cal dkımmi ftiho u fawdo dkıtyo b’Turkiya da şultonwotho kulle ksaymile bi qamayto kmahkın basimo cala zedqe da Kurdoye u bıthır kul ha dıkfotıh feme ktıhmile bi marhıbonutho xıd hawi b’Yılmaz Güney Ahmet Kaya u ğer.

Bıthır ma melani dsımle u tboco froso dkıtyo snido l’Erdoğan, mşarele ba haqarat u ba gzome mqabıl du zamoro Nihat Doğan. Me gabo hreno ba yawmothani hıdo sbutho hreto dkıtyo bu tboco froso d’Turkiya, a neşe falohyotho dkothın bu qayto dıkfulhi bu teltimo du fıstaq b’Sakaryayo. Bu zabno da neşe Kurdoye d’Mırde azolewın la botathe, hjim aclaye me gurube Turkoye tuxmonoye dımhaqarlın i hiyoyuthathe wu iqorathe xıd neşe u gzımlın a neşe bu qatlo. Hıdo ma neşe mırla; En dılo micadrinawo, kıtwo qento dhın menayna dmıqtoliwo.