KOALİSYON ATHRA-3 MRAŞHE GUBOYE CIRAQ

Bu ışmo “u admo da sohde dkıtne haye aminoyith kımrayşın u maşıqlo du ağunaydan”, u koalisyon d’Athra mtayable athmıl turgomo camoyo lu tewdico di tahrazto uda mraşhayde la guboye da mawtbe da hiğmınwotho du Ciraq di şatathe.

Lu turgomano dımtayıb bu salon du hudro d’Alqalca b’Bağdede, mıştawtafle u xuroyo Quryaqos Albartılli, mşale d’şutose di şultonutho, rişone u mathlone d’gabe u tukose folitiqoye Kaldoye Suryoye Othuroye, farsufe idice du kenşo u menyono celoyo mu camaydan ma mdinotho u qıryawotho mşahılfotho di daşto.

U turgomano mşarele b’qatinto d’şetqo cali ruho da sohde du camaydan; acmaye a Sohde d’Bağdede camu nqoşo di soğitho athronoyto du Ciraq bu leşono Caraboyo u Suryoyo. Bıthır qrın a rişone wa mathlone da gabe folitiqoye du kaolisyon d’Athra laşan dmawdıci i tahraztathe da guboye, u dobın funoye la şuwole da hadire; beynothaye u rişono du gabo du Huyodo d’Bethnahrin Athroyo-Yusuf Yahqub Matti dqrele i tahrazto da guboye du koalisyon d’Athra bu leşono Caraboyo. Bebzabno, qrın a mraşhe du koalisyon d’Athra laşan dobın mawdconutho cala hayathe wa woliyotho dmıdlın.

A mraşhe ba mamle dsımlın, tlıblın man abne du camaydan dsındilın ba guboye da mawtbe da hiğmınwotho, laşan dmisım u garanti dmitahwelın a zedqathe bu Ciraq, u dmınfıq moro li ctidutho du camaydan bu athro dan abohotho. Bu turgomano a 3 mraşhe du koalisyon d’Athra dımqadmi lu tboco froso Hanine: i mraşahto mi hiğmonutho d’Kerxeslox Walentina Wilyam Yusıf dkıtla u raqmo da 140, i mraşahto mi hiğmonutho d’Boğdod Şarara Yusuf İshaq dkıtla u raqmo da 182 wu mraşho mi hiğmonutho d’Ninwe Ma’Arıb Cimad Alyas dkıtle u raqmo da 132.

U koalisyon d’Athra koalisyon folitiqoyo da guboye’yo, mşatıs ruşmoyith 3 bu yarho d’Ob dşaficina, u kmişakıl me 5 gabe mu camaydan dkıtne: u Zawco Demoqratoyo Othuroyo, u gabo Athronoyo Othuroyo, u gabo du Huyodo d’Bethnahrin Athroyo d’HBA, u gabo du Mawtbo Camoyo Kaldoyo Suryoyo Othuroyo wu gabo d’Abnaa Alnahrayn.