08/07/2021

Kothubo Yusuf İshaq Matti nqil ma hayani

U kothubo u mbahnono idico du leşono Suryoyo Yusuf İshaq Matti, nqil ma hayani b’cımro d’90 eşne bu athro du Swed.

U mhasyo kothubo Yusuf Matti dkıtyo bu şerşayde mi daşto d’Ninwe, myatarle i betharke mothonoyto du camaydan b’casrowat d’kthowe u buhone dsımle calu leşono ucali sefroyutho Suryoyto.

 U kothubo u mbahnono Suryoyo mşamho Yusuf İshaq Matti, friş mu culmano bu athro du Swed, u trele yortutho bıthre bu haqlo du leşono, di mardutho udi sferoyutho Suryoyto. U mhasyo kothubo Yusf Matti mawladwo b’Barıtle bi daşto d’Ninwe ban 1931.

Hedor d’10 eşne qrewole u leşono Suryoyo u Caraboyo wi theoloğiya bi qlirikoyto di cito Suryoyto Orthodoksoyto d’Mawsal. Ubıthır azzewo l’Lebnon u qrewole bi bethsawbo Amerikoyto d’Beyrut u ferco da leşone Şimoye, uban 1979 qayıthwole darğo di doktora calu buhono dsımwole calu kthowo dışme; U makthabzabno d’Zoqnini u Suryoyo.

Ubu şuroyo da 80’yat mgalwewole lu Swed, u flıhwole xıd malfono du leşono Caraboyo bi bethsawbo d’Stockholm. U mbahnono akademikoyo Yusuf İshaq Matti kıtle hedor 30 kthowe u buhone dsımle cal sebwotho mşahılfotho du leşono, di mardutho udi sefroyutho Suryoyto udu kthowo qadişo, u mtargımile kthowe lu leşono Caraboyo u Swedoyo.

U mhasyo ha ma mşatsone du tukoso da Akademikoye Suryoye du Swed’ we, u kıtwole nişo dmacış a yulfone wa buhone Suryoye. U qayıthwole u şukono d’Aram dcali sefroyutho Suryoyto ba 2008 xıd iqoro la fulhone dsımle bu haqlo da buhone Suryoye Oromoye.

Check Also

Taşdaryotho me Suriya matın l’Amerika leşan dhudri bu knuşyo da 76 du Mawtbo Gawonoyo d’Emwotho Mhaydotho

Taşdaryotho frişe me Suriya, matın l’Amerika leşan dhudri bu knuşyo da 76 du Mawtbo Gawono…