Krihi a gunhe dıksaymolın Turkiya bhaq da mdinoye dıkhoyın bu garbiyo u bu madınho d’Suriya

İ mtakasto da zedqe noşoye du qlimo dı Froth du madınho d’Suriya, krıhla a’gunhe dıksaymolın Turkiya bhaq da mdinoye dıkhoyın bu garbiyo u bu madınho d’Suriya, u sımlaste sturyo Emwotho Mhaydotho cal dıkfayşo şlitho mqabıl da gunhani.

 Bebzabno, i mtakasto da zedqe noşoye mawdacla dıklozım dmitahıt klayto mqabıl Turkiya, udmimıd hşowo mena.

 U gayso kaboşo dı Turkiya kımdawım dsoyım hçome cal fenyotho mşahılfe bu garbiyo ubu madınho d’Suriya, dilonoyith a’hçome dıkmisomi b’şıkıl yawmonoyo cala fenyotho d’Mabuğ ud’Cayn Cisa, udıkmıqtıl bi netçe a’mdinoye di duktho.

Cali sbuthathe, u rişono zawgoyo di mtakasto da zedqe noşoye du qlimo dı Froth Ahmad Daoud, krıhle i şalyutho d’Emwotho Mhaydotho mqabıl da gunhe dıksaymolın Turkiya u mırle “a’tukose noşoye emwothoye u tibeloye kfayşi şalye dilonoyith mqabıl da dyoşe dıksaymolın Turkiya bu garbiyo ubu madınho d’Suriya. A’tukose emwothoye klozım dmahtiwo klayto çıddi mqabıl da gunhe dıksaumolın Turkiya ham ba fenyotho kbişe u hamıste bu garbiyo ubu madınho d’Suriya”.

Bebzabno, Daoud mawdacle dı Turkiya b’şıkıl qriho kdayşo a’timoyotho wa qonune emwothoye qum du kenşo emwothoyo uda tukose du huquq, u grışle ste u zuhoro cali şalyutho emwothoyto dkobo bahro yaroqo l’Turkiya dmaqşiyo udmazido a’gunhe wa dyoşe dıksaymolın bhaq da bnaymothoye di fnitho.

Camgabıdathe, Daoud makadle di mtakasto da zedqe noşoye du qlimo dı Froth gdımdawmo dımthabto a’gunhe dı Turkiya, u dımşadrolın la tukose noşoye tibeloye, bnişo dmimıd hşowo m’Turkiya mqabıl da gunhe barbroye dıksaymolın.

Arbıco bu yarhano bu hçomo dsımwola Turkiya wa çatawiyayda cali qritho d’Alsafawiya bi qastra d’Cayn Cisa, qtılwo arbıco farsufe mıhdo iqartho.