Kul tawditho kıtla zedqo 2 farsufe bas dhıdri bi slutho

İ şultonutho d’İsroyel fsıqla dfıtho i cito di Qyamto bu yawmo di şabtho du nuhro, elo bşart dbalhude tire farsufe mkul cito dmıştawtıfi li slutho.

 Me gabo hreno, dayroye Fransiskanoye karixi ba zabuqone di mditho catıqto d’Urışlem, u mfaraqlın tarfe da zaytune cala Mşihoye bu yawmo du cedo da Uşacne.

 Bi mıştawtfonutho du efetrufo fatıryarxoyo di marcitho d’Urışlem, d’Yurdnon u danarcotho mqadşe hasyo Mor Gabriel Dahho, sim knuşyo cama puwelıs d’İsroyel bi dayro d’Mor Marqos bi mditho d’Urışlem, bnişo dmitahto i tahrazto du yawmo di şabtho du nuhro.

Bu knuşyano, mawdıc di şultonutho d’İsroyel fsıqla dfıtho i cito di Qyamto bu yawmo di şabtho du nuhro, elo balhude kmitahwe fsoso lıtre farsufe mkul cito hasyo u dayroyo dkibın dmıştawtıfi li slutho.

Be bzabno, bu knuşyano mawdıcste dmaqimi ahfitwotho wa slawotho ruşmoye du cedo da Uşacne wi şabtho du haşo.

Megabo hreno, dayroye mi cito Fransiskanoyto mahıtlın msatrono cal fothaye u lwışlın kaffat bidothaye, u zırlın a’bote da Mşihoye bi mditho catıqto d’Urışlem bu cedo da Uşacne dımcayıd athmıl lfuth u surgodo Grigoroyo. A’dayroyani mqadamlın tarfe da zaytune la Mşihoye dfayişi athmıl ba botaththe xıd tedbire mqabıl du virus d’Corona.

Baynothaye, ha dayroyo mıstacmele mazcıqono ba zabuqone catiqe d’Urışlem, u mhawarle cala bnaynoşo dnıfqi lqum da tarce awste la kawthe, udmaydi boruktho u tarfe d’zaytune.

Athmılste dlo mıştawtfonutho d’camo, a’rişone di cito da Rum Qatholiqoye mtayablın u qerowo da Uşacne calu turo da zaytune dkıtyo mqabıl d’Urışlem i catıqto.

U rişhsayo Per Batista Pitsabala dımrayşanle u zawhano mırle “adyawma kul mede xalyo u şalyoyo, ukulmedeste ğalabe dumoroyo u mahişonoyo”.