Lavrov sımle sturyo Turkiya dkımhafdo cala ghrube marhıbone b’İdlıb

U waziro di baroyutho d’Rusya Sergej Lavrov mırle; Bıthır mi ytawto dhawyo beyn du rişono Putin udu rişqutno d’Turkiya Erdoğan, kımnasın a folhaydan dı şorın a qetre dkowe bi naşfe b’Suriya.

 Elo u waziro Rusoyo Lavrov mawdacle’ste d’Turkiya’yo, dıktucno i mşalutho dkıtne a marhıbone qawye bu qlimo d’İdlıb d’Suriya.

Bi maqırhonutho dhuwle u waziro di baroyutho d’Rusya Sergej Lavrov lu tbocofroso mawdacle, d’Rusya u Turkiya kıtte yawmoyith esore camhıdode ubı nişo dı qudrina cam Turkiya dmanqısina u kriz dkito bu qlimo d’İdlıb, mıttafqina camhıdode cal qyome frişe.

Lavrov mırle; Bu amro dhiw bıthır mi ytawto dbeyn du rişono Putin udu rişqutno d’Turkiya Erdoğan, kımnasın a folhaydan dı şorın a qetre dkowe bi naşfe b’Suriya. Elo ba dukotho dkıtne bi mşalutho d’Turkiya, a ghrobe marhıbone heş qawye’ne.

U waziro di baroyutho d’Rusya mırle’ste; A hawronaydan d’Turkiya huwolın şudoyo, dfırşi a ghrobe saqıbloye ma ghrobe marhıbone leşan dhowelın methcadronutho bu qlimo, elo hın ma ghrobani dkıtte methcadronutho acme-u Gbino d’al Nusra’yo u ghrobano heş b’İdlıb’yo. Calathe klozım Turkiya bşıkıl jıddi dmaydo i mşaluthayda.

Lfuth Sergej Lavrov, i mşalutho trayonitho dkıtwola Turkiya u dıklozım holucdo dımtabqowala, dmaydo’wa a zayne yaqure da ghrobe marhıbone dkıtne ba xtute d’İdlıb. Elo hathe’ste heş lo simo holucdo.