Lebnon mıdla dayno mu Bank dı Britho laşan usnodo da eqrotho

Ba mowat dımtagliyone, mhalaxlın lqum du parlamento d’Lebnon krıhlın i aykanoyutho harıwto du momuno du athro u tlıbe dmitalız calu şekolo di şultonutho hathto du athro.

Bebzabno u parlamento maqbele u fusqono dmimıd 246 milyone dolare mu Bank d’Britho, leşan u snodo dban alfayo yaqrotho Lebnonoye.

Bıthır mıd a folitiqore da gabe frişe d’Lebnon lo qadiri dmıttafqi calu şekolo d’şultonutho hathto, u camo naqla hreto kfix athmıl la zabuqone u mhalaxle lu bınyono du parlamento du athro b’Beyrut u tlıble, dmişakıl şultonutho zabnoyto dqudro dmaydo i sbutho du timo di lira dnahito ğalabe u dmısnodi a bnaymothoye, dkobın ağono leşan i ciyeşe.

Qum du bınyono du parlamento, şafici a mtagliyone lu makthbo di wazirutho di gawoyutho u tlıbbe dmişakıl şultonutho zabonoyto dqudri dhowelın tuxlono eba udi şultonuthathe dımdabro u athro lfuth u sebyono du camo, hol dmisomi a guboye gawonoye du athro bi şato dıbqamuthayna. Hani 7 yarhe, Lebnon dlo şultonutho’yo.

Calu qetrano du momuno d’Lebnon, dnahıt u standard da haye, cal d’zayıd u fassad, dcali u timo da muklone u dcalyo i batilutho da şuğlone, a hadome du gabo du Huyodo Suryoyo Tibeloyo’ste mtayablın takliyotho u snıdlın u qawmo du camo Lebnonoyo. Me gabo hreno u parlamento d’Lebnon, athmıl maqbele u fusqono dmimıd dayno mu Bank d’Britho.

U daynano kmişakıl me 246 milyone dolare u mbayın leşan u snodo dban alfayo d’yaqrotho dkıtne sniqoye. Mawdıc dhol falge da bnaymothoye du athro, kıhoyın adyawma tahte du xtuto di faqirutho. A zuzani masri b’tahrazto di mcadronutho l’hol 150 alfo yaqrotho ulu ağono dkobo i şultonutho mqabıl du pandemi di Corona. Camgabe da 246 milyonani,’ste, mid dayno hreno d’5.5 milyone dolare me bank Emwothoyo hreno leşan u snodo da şutose uda şırak du athro.