Leyt xabro hol adyoma mi clemtho suryoyto Dalal bıthır mıdmısiko ma hayle Turkoye

Dalal awste Duygu Arınc dkıtyo hadımto du Mawtbo Suryoyo Camoyo meqım şato msiko b’Turkiya bu bethtawso minaqayo hul ucdo layto tebo cala hayeyda.

Dalal dkıtwa hfıto bu fulhono du Mawtbo Suryoyo Camoyo u dilonoyith bu tboco froso knuşyoyo kıthwowa kıthawyotho mqabıl di barbroyutho dıksaymo i şıltonutho d’Erdoğan.

İ Dalal dkıtyo bu asıl me Şırnaq  claymtho dı cayşowa b’Hamburg d’Almanya dkıtwa yolufto da zedqe noşoye.

İ Dalal dkıtwa hfito bu Mawtbo Suryoyo Camoyo xıd gelyunoroyto kıthwowa a tebe wa mawdconwotho du Mawtbo dsamwo u fırsowalın bu tboco froso, meqım şato 22 bu yarho d’Tamız bu zabno dsımla socurutho l’Turkiya u hiya azılto li mditho d’mawlıdo eba bu bethtawso d’Stanbıl d’Turkiya kmıqtoci a esore acma minaqayo hul ucdo latyo idico mın hawi eba.

U Mawtbo Suryoyo Camoyo bi mawdconutho dhule komır i Dalal hızyo bu bethtawso d’Stanbıl inaqa dıha Polis u farsufo hreno acma mqadame ela, u bıthır mathe maqimi a dafe di sosyal medya dkıtwo cal ışma wa telefoneyda sxiri.

Lfuth i mawdconutho dhule u mawtbeyda athilın tebe mşahılfe me Turkiya dıkmawdıci du istixbarat d’Turkiya midole u mafitole mu taşniqo cal dkıtyo hfıto bayn da clayme qawmoye Suryoye u bu Mawtbo Suryoyo Camoyo.