Lfuth a hşowe du Bank d’Britho, gıdlozım hol 11 milyare dolare leşan u hethotho d’Lebnon

BEYRUT – Bu taşroro dfrısle athmıl u Bank d’Britho maglele, leşan u bnoyo u hethotho d’Lebnon bıthır mu husrono dhzele u athro mcal fothe du qrobo dımdawamle 14 yarhe beyn Hizballah u İsroyel, gıdmkalıf 11 milyare dolare. Bu taşrorano mawdıc dhol 4 alfo Lebnonoye’ste qtiliwo bu qrobano uba mo alfayo dıbnaynoşo jbiriwo dımgalwın ma dukothathe.

U husronano hawi b’10 fenyotho frişe d’Lebnon beyn d’8 bu yarho d’Teşrin u qamoyo da 2023 uhol 20 bu yarho d’Konun u qamoyo da 2024. U qrobo mşarewole bu zabno d’Hizballah mafırwole soruhe bu taymno d’İsroyel xıd snodo lu zawco d’Hamas b’Ğaza. U gayso d’İsroyel’ste baroyo mfanewole u sımwole cuqobe oyaroye cal Lebnon. 

İ şalyuthzayno dsimowa bi mescoyutho d’Amerika, mşarewola bi harayto du yarho d’Teşrin u haroyo. Lfuth u Bank d’Britho, kito sniqutho l’3.5 milyare dolare lu bınyono tahtoyo, 6.8 milyare dolare lu haqlo da bote, du endustri udu turizm. 14 milyare dolare lu bnoyo u hethotho da bote, 6.8 lu husrono momunoyo dhawi bu athro.

Elo u Bank bu taşrorano, lo mawdacle a zuzani aydarbo gıdmitaltımi. Me gabo hreno leşan u şuşoto da esore beyn Amerika u Lebnon, u rişono Trump mbayanle rişizgado Amerikoyo hatho l’Lebnon. Trump mawdacle, du tagoro idico Michel İssa dkıtyo Lebnonoyo, mbayın rişizgadoo d’Amerika b’Lebnon.