Lfuth i dafo d’Middlel East Eye Turkiya fayito li harake bnişo dmarkıwola haylo bi foqudutho oyaroyto d’Suriya dıkmidoco bu ışmo dı T4 dıknıflo qariwo mi mditho dı Tadmor

U taşroro dıfrısla i dafo Britanoyto d’Midel East İ, mathkarle d’Anqara u Darımsuq heş mu yarho d’Konun u Qadmoyo dşaficina bıthır mu tedriyo d’Başşar Alasad, ksaymiwo bazare camıhdode cal şıkıl dı qyomo di mudafaca awkith du sutoro. Lfuth u qyomano dıkmibahıs acle, Turkiya gıdım’amno haylo oyaroyo l’Darımsuq, u gıdsaymo ste sutoro folhoyo li şultonutho hathto d’Suriya dkıtyo sniqoyto ucdo l’gayso m’athrono. 

I dafo d’Midel East İ, mawdacla ste da mşale Turkoye meqım bıbsirutho kımqadmiwo li sbutho di şkihutho folhoyto Turkoyto b’Suriya, ukmawdıciwo du medano heş xayifoyo dmisım, elo a’bazare bayn d’Anqara u Darısmuq b’şıkıl şalyo kmisomiwo. 

Bebzabno, u taşroro d’Midel East İ mathkarle d’İsroyel kımqadmo li sbutho di şkihutho folhoyto Turkoyto b’Suriya xıd tehdid ela, mawxa ste mzaharle Anqara ma fulhone dıksaymolın ucdo, cal dgıdtorın Turkiya dhuyo nişo baroyo u dalqublo l’İsroyel. 

I dafo Britanoyto mawdacla ste dı Turkiya fayito ucdo li harake, bnişo dmahto ido cali foqudutho oyaroyto dı T4 dıknıflo qariwo mi mditho dı Tadmor bu mesco d’Suriya. 

Lfuth i dafo, Turkiya gıdmarkıwo sistem di mudafaca oyaroyto bi foqudutho dı T4, laşan dım’amno haylo oyaroyo li foqudutho. 

Ucdo ste, Anqara kımtaybo tahrazto laşan dmarwıho i foqudutho dı T4, u gıdmarkıwo b’gawa tayisyotho dlo pilot u tayisyotho hrene du hçomo udu duyoqo, elo i wazirutho du sutoro dı Turkiya rfıdla d’obo maqırhonutho cala fulhonani dıkmisomi b’Suriya.