Lfuth u istatıstik du tukoso Emwothoyo da Galwoye, bi şato d’2024 mvayacwolın tışcalfo galwoye a hayathe bu zabno dımnaselın dşufci a thume lğer athrawotho

BRITHO – U tukoso Emwothoyo di Galwoyutho, frısle i netiçe da buhone dsımle calu mınyono da galwoye dımvayaclın a hayathe bu zabno dımnaselın dızzın lğer athrawotho leşan dım’amni a hayathe. U tukoso The International Organization for Migration-IOM kımawdıc, bi şato dşafıcina mvayacwolın 8.938 galwoye a hayathe.

Lfuth u tukoso, u mınyonano hani 5 eşne cal hıdode rekord celoyo’yo elo kito gado rabo, du mınyono ğalabe cleytır mawxa’yo cal dkito mithe dlo mqaydi. Julia Black dkıtyo mşalonitho b’İOM kımmo; U mınyonano celoyo da galwoye dınqili ma haye  mede mahişono’yo, elo cal dkito ban alfayo d’galwoye hrene dlatne mqayde, zıttır mahişono’yo.

A yaqrotho da galwoyani kımşayli aclaye elo layto noşo dımfanelın. U mınyono celoyo da galwoye dımvayaclın a hayathe mi qıtca d’Asia’ne-dkıtne 2.788 farsufe. Bıthır mani kothın a galwoye d’hniqi bu yamo Mescoyo dıkmote u mınyonathe l’2.452 bnaynoşo. Kull şato kımvayıc ban alfayo dıbnaynoşo a hayathe ba darbonani du yamo leşan dmotın lan athrawotho d’Urifi.

Beyn di şato da 2014 uhola 2024, hniq bu darbano 24.506 galwoye. Mu şuroyo di şatathe uholucdo, mati 8.963 galwoye l’İtalya ulu athro d’Spania mati adşato 11 alfo bnaynoşo. U taşrorano d’İOM fris yawmo bıthır mıd u tukosano mawdacle, dgımıçbır dmakle hın ma fulhonayde du texliso da galwoye, cal d’Amerika qtıcla u snodayda lu tukoso.