12/04/2020

Lo sim adşato zawhe du cedo b’Urışlem

Mcal fothe du virus d’Corona dımbarbız bı britho u dhawi celtho lu mawto dba casro alfayo dıbnaynoşo, maklın adşato a zawhe du cedo di Qyamto d’Mşiho bi mdito d’Urışlem.

 Hathe inaqla qamaytoyo bıthır mowat d’eşne, dmaklın, yaste dsimi a zawhani du cedo di Qyamto ban arcotho mqadşe, dlo ma socure umu camo mhaymno.

 A citotho dkımcaydi adyawma u cedano di Qyamto lfuth u surgodo d’Ğriğoriyos, jbiri dımcaydi u cedo bu darbo du nawlo. İ mditho d’Urışlem dıkmımloyo camo bi şabtho du Haşo ubu yawmo di Sqifutho, adşato hawıl naqla bıthır mowat d’eşne xlithoyo ma socure umu camo mhaymno mi celtho du virusano d’Corona.

Calathe a citotho mıdlın a tedbirathe mqabıl du virusano u snıdlın adşato ruhaye la alat du teknoloji, uba dafe du nawlo frıslın a zawhe wa Qurobe Alohoye, leşan u camo dmıştawtıf acmaye ba slawotho. Bıgawe da citotho’ste, hadiri belhude a kohne, a dayroye wa dayroyotho.

Ba koruzwothathe a kohne da citotho mawdaclın; Britho mhaydo bu haşano dı xlıqle u virus d’Corona. Xıd ğer athrawotho’ste, jbirina adşato dmaydina tedbire ban arcotho mqadşe udı sundina ruhayna la mkone du digital udu teknoloji leşan dmotina lu camo. Elo camhbol, lo qadirina bu cedano u mbarxo dobina fağro lu camo.

A kohne mırlın’ste; Klozım kulayna dı şumcina la yadıcthone ula şultonwotho, leşan dımhafdina a haye du camo mu kewano. A citotho sxire’ne, elo kull ha menayna kibe dsoyım u baytayde cito u dımsale i sluthayde u dımcayıd u cedayde u dhowele haymonutho u sabro, dgımığlıb u virusano bi harayto.

Me gabo hreno, hani zabno d’2000 eşne lo qadıriwo a qrobe rabe u loste a gunhe, dmaklın u Vatikan dımtayıb a zawhani du cedo di Qyamto. Elo u virusano d’COVİD-19, trele du Papa Mor Fransis qadmoyo moyıd fusqono dmakle adşato a zawhani bu wahdo d’Mor Fetrus u Fawlus. U Vatikan mawdacle, du Papa jbir dmakle a zawhani calu qento dı xlıqle u virusano mqabıl di noşutho.

U camaydan dıkmcayıd adyawma u cedo di Qyamto bu Cıraq ubı Suriya’ste jbir dmakle a slawothayde wi cito Eğuftoyto Orthodoksoyto b’Mısır’ste inaqla qamayto bu makthabzabnayda, jbiro dmaklıyo a zawhayda bu cedano.