Mabuco İsarloyo di mşaynutho maglele liholo di Hizballa kımnasyo dmadcıro u haylo dkıtwola, bu tehzimo du zayno bu darbo du bethtawso d’Bayrut

BAYRUT – Mabuco İsarloyo di mşaynutho bi maqırhonutho dhule adyawma lu froshezwo d’Alcarabiya, mawdacle d’Hizballa kımnase dmadcır u haylo dkıtwole meqım b’Lebnon, u mırle “Hizballa kımnase dmahzım u zayno bu darbo du bethtawso, du lmino uda thume. Elo i aykanoyuthayde ucdo mhıltır b’ğalabe yo mqabıl du mede dkıtwole meqım mu qrobo haroyo dmabdewo bu yarho d’İlıl dşaficina. Bi hzaytaydi Hizballa kibe ste dsoyım qrobo gawoyo hatho b’Lebnon”. 

Bebzabno, cayni mabuco di mşaynutho makadle d’İsroyel bi awyutho d’Amerika gdımdawmo ba hçomayda cal Hizballa ba fenyotho mşahılfe d’Lebnon, u mathkarleste d’İsroyel kobo mawdcınwotho l’Lebnon cala dukotho dıkmıhçım aclaye. 

Camgabıdathe, cayni mabuco grışle u zuhoro cala muroye dkito bayn du gayso d’Lebnon u Hizballa bi sbutho di morutho dcalu zayno, u mırle “u gayso d’Lebnon inaqla dlıkmahıt ido calu zayno d’Hizballa, ahna khıçmina. Hizballa huweyo dıkfosıq ema u ayko kmitahwe fsoso lu gayso Lebnonoyo dmahıt ido calu zaynayde. Hizballa kıtle heş zayne stratijikoye ulıkkobıc dmaslamlın, u İsroyel ışmo ışmo kmagılyo cala dukotho dkıtne talye ebaye”. 

U mabuco di mşaynutho makadle ste da haylawotho İsarloye lıgıdmıgroşi ma hammış nuqazyotho folhoye dmarkıwila bu taymno d’Lebnon, hul dkıtle Hizballa aftho dmaqwe ruhe udmadcır u haylayde dmeqım.