Macron mabdele socurutho lu athro du Iraq

Bıthır mi socuruthayde l’Lebnon, u rişqutno dı Fransa Emanuel Macron sımle adyawma socurutho lu Iraq, u yatuw cama tlotho rişınwotho du athro.

Bi socuruthayde, Macron mabdele insiyativ du snodo di morutho du Iraq bi methcadronutho d’Emwotho Mhaydotho.

U rişqutno du Iraq Barham Salıh, mıstaqbele adyawma safrayto u baramnayde dı Fransa Emanuel Macron bu qusro d’Alsalam bı Boğdod. Bi maqırhonutho dıfrısle u ajans da tebe Iraqoye bi dafayde dı Telegram, mawdacle da tlotho rişınwotho du Iraq awkith u rişqutno wu rişwazire Mustafa Alkazimi wu rişono du parlamento Muhammad Alhalbusi yatiwi cam Macron bu qusro bı Boğdod.

Macron bıthır ma droşe dhawile, mtayable knuşyo mşawtıfo lu tboco froso camu baramnayde Barham Salıh. Bu mamlo dsımle Macron mırle “u Iraq kloqe b’tarte casquwotho rişoye dkıtne u tukoso marıhbono dı Dacış i mudaxala nuxroyto dıkmisomo m’larwal. Ahna harke laşan dsındina u Iraq u dımdawmina u snodayde”. Macron bu mamlayde, makadle du qrobo gdımdawım mqabıl di marıhbonutho hul dmıqşoco kulonoyith, elo mawdacleste di şalyutho qlimoyto bu qentoyo, uba melani mdawamle “acsquwotho ğalabene laşan dmisım u garanti di morutho du Iraq lawğıl u bi fnitho”.

Megabo hreno, u rişqutno Barham Salıh bu mamlo dsımle makadle du Iraq klozım dlowe wahdo lu qrobo bayn athrawotho mşahılfe, u makadle i ulsoyutho dmitanşıfi amabuce du snodo di marıhbonutho.

Macron athmıl casriye bi maqırhonutho dhule la gelyunore bi erişkoyto d’Bayrut, mawdacle du qrobo laşan i morutho du Iraq sbutho asasiyo, bnişo dlımitahwe fsoso lu athrano u lu camo du athrano dkaybi rişaye qum da hayle qlimoye u di marıhbonutho. Macron mawdacleste dkobıc dbone cama Iraqoye insiyativ qawyo laşan i morutho du Iraq bi methcadronutho d’Emwotho Mhaydotho.

Hathe i socurutho qamaytoyo dıksamla u rişqutno dı Fransa Emanuel Macron lu athro du Iraq, bnişo dımcadarle bu teqwiyo di moruthayde, bu zabno dıkcoyış u kriz di mwatyutho dkito bayn Waşington u Tahran mxasra, wa hjome dıksaymolın Turkiya calu garbiyo du Iraq mxasra hreto.