Macron sımle qroyto lı şalyuthzayno bıbritho

U rişqutno dı Fransa Emanuel Macron, mawdacle dıtlotho mbayın da hamşo athrawotho dkıtlın hadomutho aminoyto bu mawtbo di mşaynutho d’Emwotho Mhaydotho, maqbelın dmitaklın a’taxtuşe udmitarku şalyuthzayno gawonoyto ba nathrawotho kulle dıbritho.

U nişo du insiyatifano dmdewole u notarrozo gawonoyo d’Emwotho Mhaydotho Antonio Guteres, dmitahwe aftho lıbritho dmahto u haylayda

U notarrozo gawonoyo d’Emwotho Mhaydotho Antonio Guteres, 23 bu yarho d’Odhır dşafıcina sımwole qroyto l’şalyuthzayno tibeloyto, u grışwole u zuhoro calu sistem du hulmono dıshif ba nathrawotho dkibın qrobo.

Callathe, u rişqutno dı Fransa Emanuel Macron dımayadle u insiyatif d’Guteres, mawdacle dı tlotho mbayn da hamşo athrawotho aminoye bu mawtbo di mşaynutho d’Emwotho Mhaydotho, hınneste mawdaclın dıksındi i qroyto d’Emwotho Mhaydotho dmitarku şalyuthzayno ba nathrawotho mşahılfe dıbritho, bnişo dmahto i noşutho u haylayda mqabıl du kewo du virus d’Corona. Macron mawdacle du rişono d’Amerika Donald Trump, u rişqutno du Sin Şi Jiping wu rişwazire dı Britanya Poress Johnsson makadlın kulle dıksındi i qroyto d’Guteres, u mathkarleste dkıtle sabro dmitaqbıl u insiyatifano mu rişqutno d’Rusya Viladimer Putin ba şoce dıbqamuthayna.

Macron mırleste “kmıtyaqanno du rişqutno Putin gıdmaqbıl huweste u insiyatifano, ubıthır mdımayadle gdımtaybina video konferans, laşan dnıqlina i qroytathe b’şıkıl ruşmoyo, qawyo u hfito”.

09 bu yarhano i naqla qamaytowa dıqtırwole u mawtbo di mşaynutho d’Emwotho Mhaydotho knuşyo dıdrışwole ebe u kriz du virus d’Corona. Wucdo u mawtbo dıkmişakıl m’15 athrawotho ksoyım fulhone rabe, bnişo dmımte l’awyutho bi sbutho ida gıdmimıd tedbire mqabıl du kewo d’Corona aw lo.