Macron sımle socurutho trayonitho lu athro d’Lebnon

Hın ma folitiqoye Lebnonoye mawdace du surhobo dhawi bu neqoyo du rişwazire hatho l’Lebnon, athi luhwoyo bi netije du hboso dsımle u rişqutno dı Fransa Emanuel Macron cala rişone d’Lebnon.

Camgabıdathe, Macron bıthır mi ytawto dhawile cami amnoritho Suryoyto Fayruz, hule şudoyo la bnaymothoye d’Lebnon dgıdmisım şuhlofe mathrone b’gawıd du athro.

Bıthır mıdşafıc kımo şoce calu tewdico du mraşho hatho li rişonutho di şultonutho d’Lebnon, u rişqutno Mişel Caun mıstaqbele athmıl bu bethtawso d’Bayrut u baramnayde Emanuel Macron dıksoyım ucdo i socuruthayde i trayonitho l’Lebnon bıthır mu furqoco rabo du lmino d’Bayrut.

Hın ma folitiqoye d’Lebnon, mawdaclın du şekolo da şultınwotho meqım kıgoraşwo ba yarhe, elo ucdo bi netije du hboso dsımle Macron cala rişone folitiqoye d’Lebnon msarhıb bu neqoyo d’rişwazire hatho l’Lebnon.

Bıthır mi lqoytayde cam Caun, u rişqutno dı Fransa sımle socurutho li amnoritho Suryoyto Fayruz bu baytayda dkıtyo bi fnitho d’Alrabiye bı Bayrut. Bi socuruthathe Macron mdaşanle nişo l’Fayruz u mawdacle dkıtyo mathlo ma zmıryothayda. Bıthır mıdkamilo i socuruthathe dımdawamla şoctho u ruco, amtagılyone mıstaqbelın Macron larwal mu bayto d’Fayruz ba slogane u mazcaqlın “ahna lıkıbcina Mustafa Adib u krıfdina i tarmithathe i folitiqoyto”. Callathe Macron maftele fothe la mtagılyone u mırlelın “latno ıno dmaşteli u rişwazire hatho, elo a rişonathxu a folitiqoyene”. Macron huleste şudoyo la mtagılyone dlıktorelın l’ruhaye, u mırle “xdu şudoyo dhuli bu lalyano l’Fayruz kobenolxuste şudoyo dgıdsamno u mede dıknofıl acli hul dmisomi şuhlofe b’Lebnon udhowe b’aykanoyutho tawtır”.

Camgabıdathe, Macron adyawma bi cohnutho da 100 ışne di mşatsonutho d’Lebnon, zrıcle dawmo di Arzo xıd remzo athronoyo d’Lebnon u mırle “ba şeth şabe dıbqamuthayna gıdmibayın u qadar d’Lebnon”. U mawdacleste dkıtyo hadiro dsoyım baytoyutho lı lumodo emwothoyo bu yarho dı Teşrin u Qadmoyo dıbqamuthayna laşan dmıdroşo i tahrazto di mcadronutho d’Lebnon.

Macron bıthır mdımkamıl i socuruthayde l’Lebnon, ramhıl gıdmaftıl fothe lafu athro du Iraq, laşan dmahwe i awyuthayde camu athrano mqabıl du kriz folitiqoyo dıkloqele.

M’gabo hreno, i qadişutho du fatıryarxo di cito Suryoyto Marunoyto Mor Bşara Bıtrıs Alraci, bi maqıblonutho dsımle acme u froshezwo d’MTV mırle “u gabo d’Hizballa tarmitho İranoyto yo. U medano kodacle kul noşo. Cal dıtlıbli dmıgrış u zayno m’Hizballa thımno bi nxilutho bi xiyene. Qay balhude Hizballa kmitahwele i diloyto dıtocın zayno, qay u mrodo masroyo cam grub d’noşo aw gabo mbayno. Kulle mqadamlın sohde, w’ucdo athi u zabno dbonina athro lo athrawotho nacime b’gawıd ha athro”.