Madhlum Cabde u Aram Hanna krıhe ahçome haroye da hayle kaboşe d’Turkiya cal mdinotho frişe du garbay madınho d’Suriya

U rişono gawonoyo d’QASAD Madhlum Cabdeste, krıhle a hçomani d’Turkiya u mırle; U mhoyano d’Turkiya ba mdinoye, zıttır kıjoğır u qrobo.

Bebzabno u malolo da Haylawotho d’Suriya Demoqratoyto Aram Hanna, m’akadle du huroro d’Raqqa sim, bi awyutho ubu huyodo dkıtwo beyn da came frişe du qlimo wu krıhleste a hçome haroye da hayle kaboşe d’Turkiya cal mdinotho frişe du garbay madınho d’Suriya.

Bu mamlo dsımle u rişono gawonoyo d’QASAD Madhloum Cabde, tlıble rişo basimo la yaqrotho da qtiloye du hçomo dsımwolın a hayle kaboşe d’Turkiya cala mdinoye d’Kobani u mawdacle du bnişo da hçomani, dmaqşıın zıttır u kriz wu qrobo bu qlimo’yo wa hçomani, dyoşo da qyome kulle dımdın acma’ne. U malolo d’QASAD Aram Hanna’ste, mawdacle l’Hawar, du huroro d’Raqqa athi lu hwoyo bi netiçe di awyutho dmahwiyo beyn da came du garbiyo udu madınho d’Suriya.

Hanna mırle; Du şroro a gzome mşahılfe kımdawmi cali fnithaydan, cal du gayso kaboşo d’Turkiya mcadarle u tukoso marhıbono d’Dacış dmacış ruhe me hatho. Ahna kmıtyaqnina d’Turkiya kubco çıddi, dmarwıho a fenyotho dıkbışila b’Suriya. İ sbuthathe latyo mede talyo u loste hatho leşanayna ulu camaydan, cal du gayso kaboşo-lo belhude cal grube mbayne khoçım, elo a came di fnitho kulle kmimodi nişo.

Ba hçome dsımwolın a hayle kaboşe d’Turkiya, qtılwo 2 mdinoye u 4 hrene mçarhiwo b’Kobani, dkıtyo hdo ma mdinotho dım’amanwola Rusya ba 2019 i şalyuthzaynayda cam Turkiya. Bcayni yarho’ste mdewola Amerika qyomo cam Turkiya bi sbuthathe. Elo Turkiya naqla hreto mdawamla a hçomayda u calathe tlib me Amerika u Rusya dmaydi i mşaluthathe u dmaklın a hçomani d’Turkiya.

A tayosyotho dlo pilote d’Turkiya mdawamlın athmıl a cuqobathe hedor Kobani, b’dukotho frişe d’Tel Temır,Cayn Cisa uğer. Bebzabno mawdıc da folhe Turkoye madrelın tayosto dlo pilot d’Rusya b’Holob. Wu xıd protesto mqabıl d’Rusya dlıkmaklıyo a hçomani d’Turkiya cal Kobani, a comure hçımlın ba kefe cala radoyotho folhoye d’Rusya dkalınwo qum di bethkrihe dımcalçowa an 4 farsufe dımçarhiwo bu hçomo d’Turkiya.

Xıd hfusyo mqabıl da hçomani d’Turkiya cal Suriya, u Mawtbo Folhoyo d’Deyr Ezzor wu camo di mdito, maklelın u cboro d’konvoy d’Rusya lu macırbo d’Deyr Ezzor. Elo a hayle d’QASAD hawilın mamlo camu Mawtbo Folhoyo d’Deyr Ezzor-dkıtyo ha ma haylayde, leşan dtore u konvoyo Rusoyo dımdawım u darbayde.