23/02/2023

Madlum Cabde komer Turkiya kımdawmo a hçomayda

U rişono gawonoyo da Haylawotho d’Suriya Demoqratoyto-rabhaylawotho Madlum Cabde, grışle u zuhoro u mawdacle da hçome da hayle kaboşe d’Turkiya kımdawmi calu garbay madınho d’Suriya. Me gabo hreno mawdıc, du koalisyon Emwothoyo nqile konvoy hrene rabo d’40 qamyune la nuqazyothayde dkıtne bi Hasake.

Bi maqırhonutho dhuwle adyawma u rişono gawonoyo da Haylawotho d’Suriya Demoqratoyto-rabhaylawotho Madlum Cabde mahkele, da hayle kaboşe d’Turkiya dıkmdawmi a cuqobathe cala dukotho di Mdabronutho yothoyto du garbyo udu madınho d’Suriya. Lfuth u mede dıkmahwe, a zalzalat qaşye 6 bu yarhano d’Şbot, lo maklelın a hçomani da Turkoye.

Wa hçomani’ste kmisomi bu zabno d’Emwotho Mhaydotho kısaymo qroyto dmitaklın a hçome wa taxtuşe b’Suriya. Mawdıc d’athmıl yawme d’Arbco mfarıqco radoyto bu madınho di Qamışli bıthır mıd tayosto dlo pilot d’Turkiya mhela eba. Bi dafayde du Twitter Cabde mırle; Bu zabnano dıkmdawım u gunho noşoyo b’Turkiya, u rejim kımdawım a hçomayde calu garbay madınho d’Suriya.

U rişono d’QASAD mawdacle, Turkiya b’thomo lo şroro, kımdawmo a camlayde a barbroye mqabıl da came du qlimo. Bu zabno du kenşo Emwothoyo kınoqıl mcadronutho lu camo sniqoyo dım’athır ma zalzalat b’Suriya u b’Turkiya, a hayle kaboşe mhelın b’radoyto da mdinoye u qtilın farsufo u mçarıh ha ma hayle di mşaynutho gawoyto bi Qamışli.

Me gabo hreno, bu bzabno d’QASAD wu koalisyon Emwothoyo kımdawmi a cuqobathe cal Dacış bu garbay madınho d’Suriya, macbır konvoy hreno rabo mu thumo d’al Walid du garbyo du Cıraq la nuqazyotho du koalisyon Emwothoyo bi Hasake. 15 bu yarhano’ste naqla hreto macbarwole u koalisyon Emwothoyo konvoy rabo lu qlimo.