01/06/2020

Mahır Assad mzaharle Hizballa cali sbutho da thume

U ahuno du rişathro d’Suriya Maher Alasad dkıtyo bebzabno u rişono du grub rbicoyo du gayso d’Suriya, mşadarle egartho dkiba zuhoro qaşyo lu rişono du gabo d’Hizballa d’Lebnon Hasan Nasralla.

Lfuth mabuce du tboco froso d’Lebnon, Maher Alasad tlıble m’Nasralla dmoyıd mhatho u duyoqo da nuqazyotho da thume dbayn Lebnon u Suriya, cal dıkmamtın ba malyune dı dolare latre gabe bu darbo du tehzimo da zayne uda gelone mtanwone.

U frosqolo du Qolo d’Bayrut, makadle dqayıthle mawdconutho mhın mabuce ma fenyotho dkıtne bi morutho du rejim d’Suriya, dıkmawdıco du ahuno du rişathro d’Suriya Maher Alasad dkıtyo bebzabno u rişono du grub rbicoyo du gayso d’Suriya, mşadarle egartho d’zuhoro qaşyo lu notarrozo gawonoyo du gabo Lebnon d’Hizballa Hasan Nasralla. Bi egarthayde, Alasad mzaharle Nasralla dlımhalıq ulo dawse bi sbutho da nuqazyotho du thumo dlatne ruşmoye bayn Lebnon u Suriya.

U frosqolo du Qolo d’Bayrut grışle u zuhoro cala mawdcınwotho dkıtle dkımakdi d’Maher Alasad u Hizballa kımhaysıli kmoyutho rabtho da zuze bu darbo du tehzimo da zayne uda gelone mtanwone ma nuqazyotho lo ruşmoye dkito bayn Lebnon u Suriya. Lfuth u Qolo d’Bayrut, Maher Alasad kmaltım azuzani bgawıd qentrune rozonoye dkıtne masre camu grub folhoyo du gayso d’Suriya, ukımfarıq menaye u sahmo da grube mzayne d’Hizballa.

Bebzabno, u frosqolo d’Bayrut mawdacle d’Maher Alasad cajizoyo m’Hasan Nasralla cal dlışafıc li harake mqabıl da haylawotho Lebnonoye di mşaynutho dkıbci dsıxri anuqazyotho da thume dlatne ruşmoye bayn Lebnon u Suriya. Mawxaste Alasad mhadadle Nasralla dlıgımşadarle u sahmayde dfayış ma zuze du tehzimo du zayno uda gelone mtanwone. Callathe, u gabo d’Hizballa bi celtho du mrodo dkobe mqabıl d’İsroyel, mhadadle amşale d’Lebnon dlımdawmi bu sxoro da nuqazyotho lo ruşmoye da thume.

A’hadome du gabo d’Hizballa dkıtne b’Suriya, kıtlın i zuctho dmisafın awkith dmitatimi mu grub folhoyo d’Maher Alasad ida dımdawım Lebnon bu sxoro da nuqazyotho dlatne ruşmoye da thume, u tlıblın m’Nasralla dsoyım mudaxala laşan i şultonutho d’Lebnon dmaqimo idotha ma nuqazyothani, ubebzabno mawdaclın ele da tehdide d’Maher Alasad ğalabe jıddine.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…