Mahwe hfuxyo mqabıl da hjome dsımla Turkiya

Ba tagılyotho dımtaybi bu garbiyo ubu madınho d’Suriya, mahwe hfuxyo qaşyo mqabıl da hjome dsımla Turkiya cali fnitho d’Şigur ud’Maxmur bu garbiyo du Iraq.

 Camgabıdathe, u Huyodo Caraboyo krıhle ahjome dsımla Turkiya calu garbiyo du Iraq, u makadle di mudaxala folhoyto Turkoyto hjomo cali morutho du Iraqyo.

 Beynothaye Qamışli, Dırbesiye, Derik, ban alfayo dıbnaynoşo, layimi athmıl ba wahde frişe da fenyotho du garbiyo udu madınho d’Suriya, leşan dmahwın u hfuxyathe mqabıl da hjome dsımla Turkiya cali fnitho d’Şigur ud’Maxmur bu garbiyo du Iraq. Amtagılyone ba slogane dmazcaqlın uba lohiyotho dıtcınlın, krıhlın u qedomo du gabo d’AKP, u mawdaclın du nişo da hjomani dmıtwır u sebyono da came du garbiyo udu madınho d’Suriya, udı mımhe dharbo la dawsat makışrone dımhaqaqlınyo.

Bebzabno, hın ma mtagılyone mawdaclın lu tbocofroso, da hjomani d’Turkiya bi mcadronutho di şultonutho du qlimo d’Kurdistan athın lu hwoyo, u mırlın; İ şultonutho du qlimo xayınyo. Camgabıdathe, mtagılyone hrene mawdaclın du nişo rişoyo da hjomani dmitahıt tırpılto qum da droşe di hdoyutho da gabe Kurdoye d’Suriyane, u sımlın qroyto l’Emwotho Mhaydotho ula hayle rabe dıbritho, dnıfqi mqabıl da hjome dıksaymo Turkiya calu garbiyo du Iraq.

Mxasra hreto, u notarrozo gawonoyo du Huyodo Caraboyo Ahmad Abu Alğet, bi maqırhonutho dıfrısle krıhle ahjome dsımla Turkiya calu garbiyo du Iraq bi dacwa dıkmcaqbo amharbone di PKK, u makadle di mudaxala folhoyto dı Turkiya dyoşo li morutho du Iraqyo. Bebzabno, Abu Alğet mawdacle da hjomani lıkmisomi bi zdirutho dcami şultonutho du Iraq, u mırle; U medano kmahwe d’Ankara lıkımyaqro u qonuno Emwothoyo wa esore dkıtla cama şbobayda a Caraboye.

Meqım mathe bu yarho d’Odor dşaficina, u Huyodo Caraboyo bu fusqono dmıdwole krıhwole u cboro da hayle Turkoye lanarcotho du Iraq, u tlıbwole me Ankara d’baroyo dgırşo a haylawothayda mu athro, cal du medano kımathıl tehdid li mşaynutho umthoyto Caraboyto.