02/02/2021

Makdo i socurutho du Papa lu athro du Iraq

Walaw dhowın a şartat du hulmono casqe, elo naqla hreto i qadişutho du Papa du Vatikan Mor Fransis Qadmoyo, b’sebyono kamiloyo dsoyım socurutho lu  Iraq bu şuroyo du yarho d’Odor dıbqamuthayna.

 Mor Fransis bi maqırhonutho dhule, mawdacle d’ulsoyoyo da Mşihoye du Iraq dhozın u Papa ksoyım socurutho lu athrathe.

 I qadişutho du Papa Mor Fransis, makadle dkıtyo b’fusqono kamilo dsoyım socurutho lu Iraq, walaw ğalabe ma Mşihoye Iraqoye lıgqudri dhozanle mi celtho du virus di Corona. I qadişuthayde bi maqırhonutho dhule mırle; Ono u rucyo da noşe dıkhozın casqotho’ne. Ulsoyoyo dhozın u Papa dıksoyım socurutho lu athrathe walaw i sagiyuthathe gıdhozanle-elo belhude ba froshezwe, mi celtho da tedbire di Corona.

U ajans qatholiqoyo mathkarleste du Papa d’cımre 84 eşne b’fusqono kamiloyo dsoyım i socuruthayde lu Iraq 5-8 bu yarho d’Odor dıbqamuthayna, en dlo nıfqo şalqa hreto du qento di Corona. Meqım mathe, u mşawrono di mşaynutho athronoyto du Iraq Qasem Al Acraji, mawdacwole du athrayde hadiroyo b’şıkıl kamilo li socurutho du Papa, u mawdacwoleste a hedriyat wa sniqwotho dkito leşan dmakışro i socuruthathe u kulle mtaybene.

U Papa lfuth i tahrazto di socuruthayde, kmıntır bu şuroyo dızze l’Boğdod, ubıthır li daşto d’Ninwe, lu qlimo d’Kurdistan u li mditho makthabzabnoyto d’Ur dmawladwo eba Abrohom u nbiyo. Bı Boğdod i qadişuthayde gıdmtayıb Qurobo Alohoyo bi cito d’Sayıdıt Alnajat da Suryoye Qatholiqoye dhjımwo ba 2010 acla ma marıhbone u dnafılwo hedor 50 farsufe mu camaydan sohde.

Bıthır mathe, Mor Fransis gıdsoyım socurutho l’Mawsal uli daşto d’Ninwe dilonoyith li mdito Suryoyto d’Bağdede dıkhoye eba u menyono celoyo dkulle du camaydan bu Iraq. I qadişuthayde bi socuruthayde lu qlimo d’Kurdistan gıdmtayıb Qerowo Elohoyo bu wahdo rabo di esfireğlo bi mdito d’Arbil.

I rişathizgadto du Iraq b’Roma Safiyya Alsuhayl bi maqırhonutho dhula mırla; İ socuruthathe kıtla sukolo rabo cal dıkmathlo snodo lu Iraq dkıtle mathlonutho bıgawe di cito Qatholiqoyto b’darğo d’kardinal. U mxasra hreto i socuruthathe kımathlo egartho li ulsoyutho du fyoşo da Mşihoye du madınho ban athrawothathe, beynothaye a Mşihoye du Iraq.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…