Malolo di wazirutho di baroyutho d’Amerika Ned Price: ‘Tehran, qtila u gado dqudrina bşıkıl msarhıbo ducrina lu qyomo di tahrazto nukleer du İran da 2015’

WAŞINTON – U malolo di wazirutho di baroyutho d’Amerika Ned Price mawdacle, dlatte ucdo plan d’ducri lu qyomo dcali tahrazto du nukleer du İran. Price d’rfıdle d’Woşington kıtla droşe camu İran bi sbutho du qyomano u mırle; “Tehran, qtila u gado du dcoro lu qyomno bşıkıl msarhıbo, bıthır mıd rfıdwola kamiloyith bu yarho d’İlül.”

U qyomano hadiro’we dmitafıt la haye bu zabnawo elo Tehran rfıdwola, bıthır mıd u kenşo Emwothoyo mahwewole hfuxyo mqabıl du qedomo qaşyo du İran la mtagliyone dkfixiwo la zabuqone calu qatlo d’Mahsa Amini. U macırbo’ste mahıtwole tedbire hathe calu İran u Woşington’ste mu zabnawo, maqımwola u qyomo du nukleer du İran mu yawmoyayda.

Amerika thımwola Tehran’ste bu şedoro d’tayosyotho dlo pilote l’Rusya leşan dımdawmo u qrobayda b’Ukraina. Bu zabno du ruğzo du macırbo kımdawım mqabıl d’Tehran udu cnufyo dıkmıstacmılo mqabıl da mtagliyone, u ajans d’IRNA adyawma mawdacle, dqtil ha ma Noture du Qawmo du İran qum du tarco du baytayde bu taymno d’Tehran.

Lfuth IRNA kito ihtimal rabo du folhano qtil me ganowe elo u mede dıkgorış u zuhoro, du folhano qtil bu yawmo du duxrono şatonoyo du rabhaylawotho Qassem Suleymani’yo. Bu duxronano da 3 eşne du qatlo d’Suleymani b’Boğdod ma hayle Amerikoye, wu İran’ste mkararle dgımdawım a fulhonayde leşan dmihaşwi a qatlayde.