Maqım bethdino mqabıl 3 marhıbone dı Dacış bu Swed u Almanya

SWED / ALMANYA – Osama Krayem dkıtyo ucdo 32 eşne mawladwo ban 1992 b’Malmö du Swed me emo u babo dımgalwewolın me Suriya. U farsufano, b’cımro d’22 eşne nahıt l’Suriya u mıştawtafwole ba 2014 lu tukoso marhıbono d’Dacış u kmidıc, u marhıbono rabo du Swed. 4 bu yarho d’Hziron’ste gıdmşaryo i mahkamayde.

U marhıbonano kmidıc dkıtle asirutho bha ma hawbe barbroye dsımle Dacış u dıkmıkrıh b’britho kula. Bi harayto da 2014 madrıyo’wa tayosto d’Yurdnon u msıkwo u pilotayda Muadh al Kasasiba. Bu video dgrışwo buu yarho d’Şbot da 2015, kımahwe Dacış aydarbo kımawqıdi u pilot huwe ba haye b’qaffas.

U marhıbono Krayem kırofıd a thome du qatlo du pilot elo kımawdıc dkıtwe tamo hadiro. B’Yurdnon’ste sımwo tagliyotho rabe mqabıl du qatlano du pilot. U marhıbonano, kmıthım’ste bğer hawbe barbroye ba 2015 b’Fransa, qtiwole 130 bnaynoşo u bıthır şato, qtiwole 32 farsufe b’Bruksel. Ban athrawothani hkimoyo u marhıbono cımre kule lu hbuşyo. İsa Al-Hassan, u marhıbono hreno dımşarele u bethdinayde bi mdito d’Düsseldorf d’Almanya’yo.

A buqore qamoye di mahkamathe, calu galwoyo Suri dıkmıthım bi asirutho dcam Dacış’yo. U marhıbono hçımwole meqım şato bi skino calu camo dlayımwo lu cadcido du qayto b’Solingen u qtiwole 3 farsufe. Camani u mqımdino gawonoyo d’Almanya athmıl mawdacle, dımsıklın mşalo catiqo da istixbarat du rejim dkıtwe bu tayman macırbo d’Suriya. U farsufano dıkmidıc bu ışmo d’Fahad A mid ucdo la buqore bu bethdimo, ma thome du qatlo, ba teşniqe ubğer hawbe noşoye dsimi ba hbuşe du rejim.