13/06/2021

Maqım slawotho u teşmışyotho la sohde du Sayfo bı citotho mşahlıfotho

Adyawma-yawme d’Huşabo, hın ma citotho du cameydan bu athro ubi golutho, mathkarlın u yawmo du duxrono du Sayfo dan 1915.

Ba mamle dsımlın a kohne, mahkelın calu Sayfo u hın menayeste mahkelın du cameydan wi claymuthaydan klozım dobın ağuno mqabıl da hçome dkowe calu cameydan.

Adyoma dkıtwe yawme dhuşabo dmeqım 15 hzirın dkıtyo u yawmo du duxrono du Sayfo hın ma citawotho du cameydan maqımlın temeşyotho dda sohde u be bzabno sımlın mamle cali macne du yawmo du duxrono du Sayfo. Lfuth i mawdconutho dmıdlan me hın ma athrawotho dsımlın u duxrono u huşabno kito i efetrufutho fatıryarxto du Swed dkıtyo bi rişonutho d’mor Diyosqoros Benyamen Ataş maqımlın temeşto da sohde bi cito u bıthır nafiqi qmi qoyumto du Sayfo dkıtyo bi dırto di cito u mahkelın cali macne du Sayfo.

İ cito d’Mor fetrus u Faulus d’Norsborg bi rişonutho d’Xuroyo Şabo sımlın u duxrono du Sayfo b’Slutho dilonoyto dsımolın larwal di cito qmi qoyumto du Sayfo dkıtlın bi dırto di cito. Bu mamlo dsımle Abuna u xuroyo mqalasle u ağuno dhulın a abohotehydan u mırla ahna klozım dobina ağuno laşan fayşina ba haye u lo masılmina ruheyna. Bşi cito d’Mor Aho d’Örebro dkıtyo bi rişonutho d’qaşişo Ablahad Dağ mathkarlın u sayfo u mahkelın dıklosım mınfıq moro lu duxronano.

Bu athro d’Hollanda bi mawdconutho dhule u efetrufo fatıryarxoyo Mor Poliqarpus Awgin Aydin mırle hınne xıd marcitho bu yawmo da 15 bu yarho dkıtyo u duxrono du Sayfo i şoctho ba şwac gıdsaymi u duxrono lfuth a tadbire di Corona.  Elo adyoma bi cito d’Yoldathaloho d’Hengelo u kohno di cito Yuhanın Saliba mathkarle a sohde du Saufo u mahkele cali ulsoyutho du yawmano u mırle ahna xıd cito ktorina a gabe wa şutose du cameydan bi hiruthathe mın dı qorın cal ruhaye. I cito d’Mor Awgin d’Hengelo gıdsami u duxrono yawme dıtlotho dkıtyo u yawmo du duxrono du Sayfo.

Lfuth i mawdconutho dmatilan me Almanya hın ma citawotho dkıtne bi fnitho Gissin wizbaden u hedora ste sımlın u duxrono du sayfo:  b’Wizbaden i cito d’Mor Eşacyo Holoboyo dkıtyo bi rişonutho du xuroyo sabri şahin maqımlın teşmeşto da sohde u bıthır azzın qmi qoyumto du sayfo u mahatlın klilo d’warde. Wi cito d’Mor barsaumo dkıtyo bi rişonutho du kohno Kenan Budak bıthır mi teşmeşto da sohde sımle mamlo calu sayfo. Mor Afrem Mor Tewodoros  bi rişonutho du kohno Lahdo Aydin mathkarlın a mdinotho u qıryawotho dhawın bınne u Sayfo wi cito d’Mor Eliyo Xuri Skandar Kucukkaplan hiye mqadamle teşmeşto u mamlo lu yawmo du duxrono du Sayfo.

Bu athro d’Austurya a 3 citawotho du cameydan dkıtne  i cito d’ Mor Afrem bi rişonutho d’xuroyo Emanuel Aydin wi cito d’Mor Petrus Paulus dkıtyo bi rişonutho d’qaşişo Samuel Ücel wi cito d’ Yoldath Aloho dkıtyo bi rişonutho d’qaşişo Tuma maqımlın teşmeşyotho da sohde u mqadamlın mamle cali macne du Sayfo.

Bu athro d’Spanya bAlacante ste i duktho dkito galwoye du cameydan mu Swed me athrawotho hrene mathkır u sayfo bi slutho dsımle abuna Xuroyo Abrahım Gares.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…