Marfın amtagılyone hbişoye du Iraq

U rişwazire du Iraq Mustafa Alkazimi dhule amro dmitarfın a mtagılyone hbişoye, mawdacleste dımşatıs sictho da buqore dcala gedşe du cnufyo dımşarewole ha bu yarho dı Teşrin u Qadmoyo dşaficina. Me gabo hreno, atagılyotho camonoye du protesto hani tıre yawme mabdelın me hatho bhın ma mdinotho du Iraq, u twırlın bu şıklano hedor dı tlotho yarhe di şalyutho udu mnoco du nfoqo cboro, bu taro da tedbire dımbayniwo mqabıl du virus d’Corona.

Bıthır mu knuşyo qadmoyo di şultonutho hathto du Iraq, u rişwazire Mustafa Alkazimi mawdacle dımşatıs sictho da buqore dcala gedşe dhawın kulle bakmo yarhe dşaficina da tagılyotho camonoye du protesto, ubu mamlo dsımle hule şudoyo dgıdmoyıd hşowo mani dbızlın u admo Iraqoyo, dmitahwe tazminat la yaqrotho d’zıd me 550 mtagılyone dıqtili, udmınfıq moro la mjarhe. Bebzabno, Alkazimi mawdacle dmadcarle u rabhaylawotho Cabdılwahab Alsacidi li wolithayde u mbayanle rişono du şutoso dıknofıq mqabıl di marıhbonutho.

Me gabo hreno, atagılyotho du protesto dhani tlotho yarhe kalyene mi celtho du virus d’Corona, athmıl naqla hreto mdawamlın ba mdinotho mşahılfotho, u tlıblın dmisım şuhlofe folitiqoye udmitaqimi a’rişone du fasad.

Baynothaye i mditho d’Albsara ud’Alnajaf athmıl ba mowat mtagılyone layimi ba wahde rişoye da tre mdinotho, u tlıblın dmitaqım u hiğmuno d’Albasra wa tre tahlufayde mi wolithaththe. Lfuth şutose gawoye du tboco froso du Iraq, mabuco di mşaynutho mawdacle dımtagılyone dcımre 20 ışne qtil athmıl ba buğro dımhe b’rişe u mjarıh arbıco mtagılyone hrene bi hiğmonutho d’Albasra. Be bzabno, hın ma hfite mdinoye mawdaclın du mtagılyono qtil ba buğre dmarıs acle mhın grube mzayne dıkmısnodi mu İran.

Camgabıdathe, a’haylawotho di mşaynutho du Iraq mawdaclın adyawma dımsıklın bu noquso hamşo mzayne mu gabo dıkqore ruhe u Zawco du Hayf d’Aloho. Afarsufani msiki cal dmarıslın buğre cala mtagılyone dlayimi athmıl qum du qentrunaththe bi mditho d’Albasra bu taymno du Iraq. A’haylawotho di mşaynutho mahıtlın ido cala tfınag, cala zayne ucala buğre dımqafın b’gawıd du qentrunaththe.