Marten Manna sımle qroyto li şultonutho du qlimo d’Kurdistan dmisım u sutoro di şkihutho da Mşihoye

WASHINGTON – Bu taro di socurutho ruşmoyto dıksamla ucdo lu athro d’Amerika, u rişwazire du qlimo d’Kurdistan du Ciraq Masrur Barzani laqi b’waşington u rişono du şutoso da Kaldoye d’Amerika Marten Manna. 

I lqoytathe athyo luhwoyo bu taro du zawho du mdoyo dı tre qyome bayn di şultonutho du qlimo u tarte şırak Amerikoye dımtayıb yawme dı Tre dşaficina bi qelayto di tagorutho d’Amerika b’Waşington. 

Bi ytawtathe dıdrişo eba i aykanoyutho da Mşihoye bu Ciraq ubu qlimo d’Kurdistan, Manna rızle a’qetre u casqıwotho dıkloqelın u camaydan u şerşoyo b’gawıd du athrayde, u makadle i ulsoyutho dmisım u sutoro di şkihuthayde udmitaqwe u dawro dıkmıştacele b’gawıd du kenşo athronoyo du Ciraq, dilonoyith bu taro da şartat qlimoye du maşıqlano ducdo. 

Camgabıdathe, Manna mqadamle egartho ruşmoyto li mdabronutho d’Waşington. Bi egarthayde Manna mşalatle bahro cali aykanoyutho casqo dıkşofıc eba u camaydan bu Ciraq ubu qlimo d’Kurdistan, u sımle ste qroyto l’Waşington dmıştacyo dawro emwothoyo rabtır bu snodo da zedqe du camaydan ubu garanti du dactidaththe bu athraththe u makthabzabnoyo bu Ciraq.