MASIRHONUTHO KOHNO Lİ MARCİTHO D’ALMANYA

İ masırhonuthathe dsimo bi rişonutho da tre hsayo d’Almanya ud’Hollanda, hadırla menyono celoyo d’kohne u camo ma mdinotho mşahılfe d’Almanya gawonoyith.

İ masırhonutho du kohno Filippos Kör simo athmıl bi cito rabtho dkıtyo bi mditho d’Ştatlon da n’Almanoye dıkcorela zıttır m’alfo farsufe.

Bıthır mi masırhonutho, u camo hadırwa bu salon dkıtyo qariwo mi cito, u harke mqadmi a’tahanyotho lu kohno hatho.

Cal ışme da şutose du Mawtbo Umthoyo d’Bethnarin di marcitho d’Hollanda, mıştawtafle u mlahmono Yusıf Byukqahraman. Ucal ışme d’Suroyo TV mıştawtafle u mşalo qlimoyo Muşe Mutlu.

U kohno hatho Filippos Kör mawlıd bi mditho d’Bebra bu athro d’Almanya, an’abohothayde kothın mu qlimo d’Şırnax dı Turkiya. Bıthır mdımkamewole i madraşto şarwoyto mıdwole u yulfono di Mşihoyutho bi dayro d’Mor Afrem bı Darımsuq. Bıthır mu yulfonano dımdawamle tloth ışne dacır lu athro d’Almanya, u fayış tloth ışne notarrozo bi marcitho di cito Suryoyto Ortodoksoyto d’Almanya. U kohno Filippos zabno d’hammış ışne mawlafwa u leşono Suryoyo wi Mşihoyutho bi madraşto citonoyto d’Bebra. Ubu zabno haroyo nqile li mditho d’Gronaw u hawi malfono ruşmoyo du leşono Suryoyo.

Cal ışme d’Suroyo TV, kımhanena u kohno hatho Filippos Kör u ktılbinale kuşore bi mşablonutho di marcithayde.