22/06/2021

Masrıh Efesqufo hatho li marcitho du macırbo d’Amerika

Masrıh efesqufo hatho li marcitho du macırbo d’Amerika di cito Catıqto d’Madınho.

Bu zawho ruhonoyo dımtayıb bu qlimo d’Arizona, qaşişo Şamli Tamras masrıh efesqufo bu syomido di qadişutho du fatıryarxo Mor Aday Trayono.

Yawme d’Huşano dşaficina dkıtwe u duxrono du cedo d’Fantiqusti, i qadişutho du fatıryarxo di cito Catıqto d’Madınho Mor Aday Trayono mrayşanle ba şoce d’safrayto u zawho di masırhonutho d’efesqufo hatho li marcitho du macırbo d’Amerika. U zawhano mtayıb bi cito du sohdo Mor Gewargis bi mditho d’Finix bu qlimo d’Arizona d’Amerika.

Bu syomido du fatıryarxo Mor Aday Trayono, qaşişo Şamli Tamras masrıh lu darğo di efesqofutho bu ışmo efesqufo Mor Fetrus Tamras, ubu şıklano hawi u rucyo hatho di marcitho du macırbo d’Amerika di cito Catıqto d’Madınho.

Lu zawho di masırhonutho mıştawtafle u rişono di marcitho d’Australya udı Newziland hasyo Mor Yacqub Daniel, u efesqufo du madınho d’Amerika Mor Gewargis Yunan, u menyono celoyo d’kohne u şamoşe cam kunoşo ma mhaymne du camaydan.

Bıthır mıdkamıl u tekso di masırhonutho, u efesqufo hatho Mor Fetrus Tamras mrayşanle u qurobo alohoyo laşan u duxrono du cedo d’Fantiqusti. Ubıthır mathe u ikliros di cito wu camo maftelın fothaye lafu salon di cito d’Mor Gewargis, u mqadamlın a’tahanyothaththe lu efesqufo hatho di cito.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…