Masrıh kohne u şamoşe bu athro du Swed

U efetrufo fatıryarxoyo di marcitho du Swed di cito Suryoyto Orthodoksoyto hasyo Mor Benyamen Ataş, masrahle kohno hatho li jamaca di mditho d’Halmstad du Swed. Afıdyaqun Matta masrıh kohno hatho li cito d’Mor Matay.

 Bebzabno hasyo Benyamen, masrahleste 2 şamoşe lu darğo d’Afıdyaqne. Lu zawhano dımtayıb bi cito da Serb Orthodoksoye d’Halmstad, mıştawtaflele kohne du camaydan me mdinotho frişe du Swed.

U efetrufo fatıryarxoyo di marcitho du Swed di cito Suryoyto Orthodoksoyto hasyo Mor Benyamen Ataş, sımle adyawma socurutho lu camaydan dıkhoye b’Halmstad leşan dımrayşın u Qurobo Alohoyo wi masırhonutho d’kohno hatho u 2 şamoşe. Lfuth i mawdconutho dmatilan, hasyo Benyamen masrahle şamoşo Matta lu darğo d’kohno li jamaca di mditho.

U kohno hatho dmawlıd u d’yarıw bu Iraq, qrele teoloği bi dayro d’Mor Matay u malfono du fisik u du hşowoyo. Camatheste i mcalyuthayde, masrahle şamoşo Silvan u şamoşo Nasir lu darğo d’Afıdyaqne. Şamoşo Silvan u rişono du Mawtbo di citoyo u hani 20 eşne xdımle i jamaca bı fulhone frişe. Şamoşo Nasirste u abro du Xorepiskopos Suleymanyo u mkamele u yulfonayde di theologia bi madraşto celoyto d’Mor İğnatiyos u bu dactith, dkito dmitasrıhste kohno

İ slutho wi masırhonuthateste, simi lfuth a qonune da tedbire mqabıl di Corona bi cito da Serb Orthodoksoye bi mıştawtıfonutho d’6 kohne di marcitho. İ jamaca d’Mor Matay hfıtoyo u kıtla hol 100 yaqrotho hadome u Abuna Alias me Huskvarna mrayşanwo a slawotho wa fulhone ruhonoye hrene di jamaca d’Halmstad.

Hasyo Benyamen, mqadamleste a tahınyothayde li jamaca cali masırhonutho du kohno hatho, lu mawtbo di cito cala fulhone dıkmaşe bi mditho u li cito da Serb Orthodoksoye cal dhadiri acmaye u dı qadiri dmıstacmıli i cito bi masırhonuthathe.