Masrıh tıre kohne li cito Kaldoyto d’Bobıl b’Ankawa

Masrıh tıre kohne li marcitho du Iraq di cito Kaldoyto d’Bobıl.

Bu zawho di masırhonutho dsim bi mditho d’Caynkawa, mıştawtafle rişone u mathlone ma citotho mşahılfe du camaydan bu Iraq, u ba mowat dımhaymıne.

 İ cito Kaldoyto d’Mor Yawsef bi mditho d’Caynkawa bi hiğmonutho d’Arbil, sımla yawme d’şabtho dşaficina baytoyutho l’qurobo alohoyo dımrayşanle u rişhsayo di marcitho d’Arbil Mor Başar Matti Warda, u dmıştawtaflele menyono celoyo dıhsayo, efesqufe u kohne ma citotho mşahılfe du camaydan bu Iraq, baynothaye u rişono di marcitho d’Mawsal u hedora di cito Suryoyto Ortodoksoyto hasyo Mor Niqodimos Dawud Matti Şaraf.

Lu qerowano mıştawtafleste ba mowat dımhaymne mu camaydan d’Caynkawa u di daşto d’Ninwe, şamoşe u dayroyotho cami gudo du koral di cito d’Mor Yawsef u gudo hreto di musiqi u da qole citonoye.

Lfuth u tekso di cito Kaldoyto u bzawho ruhonoyo dilonoyo, atre şamoşe ewengeloye Milan Kakkuni u Savyo Handula masırhi kohne li marcitho d’Caynkawa.

Bıthır mıdkamıl u zawho di masırhonuthaththe, a’tre kohne hathe qaşişo Milan u qaşişo Savyo ba mamle dsımlın, hulın şudoyo dgıdsaymi i mşablonutho citonoyto da marciyothaththe lfuth a’fuqdone d’Aloho, u mqadamlın ste a’tawdiyothaththe lkul man dhawilın mcadrono laşan dşowın lu darğo di kohnutho.