Masrur Barzani lıhele i hiyoyutho umthoyto da came

U rişwazire du qlimo d’Kurdistan du Iraq Masrur Barazani, b’arbac leşone baynothaye u Suryoyo mhanele a’bnaymothoye Kurdistanoye.

 Elo Barazani bu şıkıl dıkthule bi dafayde du Twiter, Iıhele i hiyoyutho umthoyto da came dıkhoyın bu qlimo, u mawdıcile xıd barmothoye Kurdistanoye dıkmıjğoli b’leşone mşahılfe.

 Emwotho Mhaydotho mbayanla 21 bu yarho d’Şbot mkul şato yawmo tibeloyo du leşono emhoyo, bnişo dmitaqwe u şuhlofo dkito bayn da came dıbritho bu haqlo du leşono udi mardutho, elo a’rişone du qlimo d’Kurdistan du Ciraq mdarbıd dmaqwın a’gawne umthoye u mardutho mşahılfe dkıtlın, kımdawmi camıhbol bu dyoşo du camaydan dıkhoye bu qlimo d’Kurdistan dkıtyo u cafro da n’abohothayde.

U rişwazire du qlimo d’Kurdistan Masrur Barazani, athmıl mbayn d’arbıco leşone mşahılfe baynothaye u Suryoyo, mhanele xıd komır a’Kurdistanoye kulle bi cohnutho du yawmo tibeloyo du leşono emhoyo.

Barazani bi dafayde du Twiter hawxa kthule ba leşone Kurdoyo, Caraboyo, Suryoyo u Turkoyo, “kımhanena a’Kurdistanoye kulle bu yawmo tibeloyo du leşono emhoyo”. U medano kothe li mıcne d’Barazani mdarbıd dmaqım a’came du qlimo klohelın, mdarbıd dmıctarıf ba hiyoywotho umthoye mşahılfe dıkhoyın bu qlimo kmankarlın u ksamlın kulle barmothoye Kurdistanoye, elo kmıçğoli b’leşone mşahılfe.

U qlimo d’Kurdistan du Ciraq xıdwothe xda n’athrawotho Caraboye u xıd Turkiya, i naqla dlıkothe luhşowaththe a’Suryoye Mşihoye ne, yaste Carab, Kurd u Turk ne dıkmıçğoli b’leşono Suryoyo.

Megabo hreno, u waziro di gawoyutho du qlimo d’Kurdistan Ribır Ahmad bu knuşyo dsımle lu tboco froso, mawdacle dhın farsufe dşafciwo lu qlimo hınnene dsımlın a’hçome haroye da soruhe dımhalqiwo calu bethtawso d’Arbil ucal hın şawthawotho di mditho. Ahmad mawdacle ste da farsufani qadiri dşıfci l’Arbil mi celtho di rafyutho du duyoqo dıksaymo i Peşmarga cala farsufe dıkşıfci lu qlimo ma hiğmınwotho mşahılfe du Ciraq. Callathe, u waziro Ahmad mawdacle du hçomano kımtahbıt dıklozım dhowe methcadronutho bayn da şultınwotho d’Arbil ud’Boğdod udu koalisyon emwothoyo mqabıl da farsufe dıkdayşi u qonuno.